Өмнөговь аймгийн Цогтцэций сумын нутаг дахь Тавантолгойн бүлэг ордоос Гашуунсухайт хилийн боомт чиглэлд шинээр барьж буй 240.3 километр авто замын хөдөлгөөнийг өнөөдөр нээж, нээлтийн арга хэмжээг зохион байгууллаа.

Тус авто зам нь Тавантолгой–Гашуунсухайт чиглэлийн хүнд даацын авто замын бүтээн байгуулалтын хүрээнд хэрэгжиж буй чухал хэсэг бөгөөд уг зам ашиглалтад орсноор нүүрс болон бусад экспортын бүтээгдэхүүний тээвэрлэлтийн нөхцөл сайжирч, тээвэрчдийн хөдөлгөөний аюулгүй байдлыг хангах, тээврийн зохион байгуулалтыг боловсронгуй болгох, экспортын гарцыг нэмэгдүүлэхэд чухал ач холбогдолтой юм.

Нээлтийн арга хэмжээнд Зам, тээврийн сайд Б.Дэлгэрсайхан, Өмнөговь аймгийн Засаг дарга Н.Энхбат болон холбогдох яам, байгууллагын удирдлагууд, Ханбогд, Цогтцэций, Баян-Овоо сумдын Засаг дарга нар оролцлоо.

Энэ үеэр Гашуунсухайт хилийн боомтоор импортын бараа бүтээгдэхүүн, тэр дундаа барилгын материалыг нэвтрүүлэх, тээвэр логистикийн үйл ажиллагааг сайжруулах, боомтын нэвтрүүлэх хүчин чадлыг нэмэгдүүлэх чиглэлээр санал солилцож, бодлогын түвшинд анхаарч ажиллахаа албаныхан хэллээ.

Ийнхүү Тавантолгойн бүлэг ордоос Гашуунсухайт хилийн боомт чиглэлийн авто замын бүтээн байгуулалт үе шаттайгаар урагшилж, экспортын тээвэрлэлтийн дэд бүтцийг сайжруулах, тээвэрчдийн ажиллах нөхцөл, аюулгүй байдлыг дээшлүүлэхэд бодит ахиц гарч байна.