Нийслэлийн Баянгол дүүргийн хоёрдугаар хорооны нутаг дэвсгэрт таван хүн харамсалтайгаар амиа алдсан хэрэг гарсан. Тодруулбал, гурав нь газар дээрээ хоёр иргэн нь эмнэлэгт хүргэгдээд нас барсан байна. Эдгээр иргэдийг архинд хордсон байж болзошгүй гэж үзэж байгаа гэнэ. Учир нь хэргийн газраас "Найрсаг" нэртэй архины шил, "Гайхмаараа" шил арчигч бодис олдсон байна.

Хэргийн газарт нийт 247 улсын байцаагч, ажилтан ажиллаж, архи согтууруулах ундаа худалдан борлуулдаг болон түүгээр үйлчилдэг 761 газрыг хамруулан шалгалт хийж, сэжиг бүхий 3363 шил архийг битүүмжлэн лацадсан байна. Мөн 52 дээжийг итгэмжлэгдсэн лабораториудад хүргүүлэн шинжлүүлж эхэлжээ. Шинжилгээний хариу өнөөдөр гарах аж. Одоогоор уг хэрэгт мөрдөн байцаалтын ажиллагаа явуулж байгаа юм байна. 

Мөн Нийслэлийн Засаг даргын зөвлөл яаралтай хуралдаж ажлын хэсэг байгуулжээ. Ажлын хэсэгт УБХЦГ, НМХГ, НЭМГ, НОБГ-ын албан хаагчид багтжээ. Тэд ямар учир шалтгаанаар иргэд нас барсныг тодруулах, цаашид авах арга хэмжээний талаар санал боловсруулахаар ажиллаж байгаа аж.