Сэлэнгэ аймгийн Засаг дарга Ш.Оргил тэргүүтэй аймгийн удирдлагын баг Монгол улсын Засгийн газраас томилогдсон ажлын хэсгийг хүлээн авч уулзлаа. Монгол улсын Засгийн газрын хэрэг эрхлэх газрын ахлах референт П.Зоригтбаатар тэргүүтэй ажлын хэсэг Алтанбулаг боомтыг орчин үеийн боомтын түвшинд хөгжүүлэхэд шаардагдах асуудлуудыг судалж шийдвэрлэх, аймгийн төв Сүхбаатар хотод “Хөгжлийн хөтөч-Дэд бүтэц”-ийн төслийг хэрэгжүүлэх зорилгоор тус аймагт ажиллалаа. Алтанбулаг сумын хилийн боомт, чөлөөт бүсд орчин үеийн шаардлагад нийцүүлэхээр тулгамдсан асуудлууд багагүй бий. Үүнийг дагаад Алтанбулаг сумын хөгжлийн асуудлууд ч хөндөгддөг. Аймгаас хил түүнийг дагасан чөлөөт бүс, Алтанбулаг сумын хөгжлийн асуудлыг тус тусад нь ярих биш нэг цогцоор нь авч үзэн шийдвэрлэх шаардлагатай гэсэн байр суурьтай байгаагаа уламжилсан бол ЗГХЭГ-ын ахлах референт П.Зоригтбаатар ч аймгийн энэхүү саналыг дэмжиж байгаагаа илэрхийлэв.