Нэгэн сайн аавын сайхан түүх олон олон залууст амьдралын амтыг мэдрүүлэхээр кино бүтээл болон мөнхөрч үлдлээ. Аз жаргал гэрэлтсэн царай, эгэл даруухан нэгэн таксины жолооч “Хэн нэгэн” гээд иргэний хөрөг нэвтрүүлгээр гарч “Намайг Туяагийн Даваасүрэн гэдэг. Би 35 настай, таксины жолооч хийдэг” гээд л инээмсэглэн яриад сууж байсан нь саяхан. Гэхдээ үхэж, төрөх хорвоогийн жамаар өнөөдөр таксины жолооч Даваасүрэн ах маань хорвоогийн мөнх бусыг үзүүлчихээд байна.

Тэрбээр энэ хорвоогоос тун удахгүй явах гэж байгаагаа мэдэж байсан юм шиг л нэвтрүүлгийн төгсгөлд “Би гэргийгээ тоглоомоор “Гэр гийгүүлэгч байна уу” гээд л утсаар ярьдаг. Ингээд гэр гийгүүлэгчдээ, таван сайхан үрдээ маш их хайртай шүү. Аав нь та нарынхаа төлөө бүх л сайн сайхан бүхнийг хийнэ. Заавал чадна. Хүнд гачигдах дутагдах зүйл гардаг. Тэр бүхнийг ч даван туулна. Чадна чадна бүх зүйл сайхан болно гэж хэлдэг шиг үргэлж бүх зүйл сайхан болно. Аав нь хүүхдүүддээ хайртай шүү” хэмээн амлалт өгч байсан юм. Ёстой нэг аав хүн гэж ийм л байх ёстой юм уу даа гэмээр. Түүний энэхүү эгэл хэрнээ эгэлгүй эрхэм амьдрал өнөөдөр “Сайн аав” нэртэй дэлгэцийн бүтээл болон мөнхөрлөө.

Түүний энэ сайхан чанарыг хүмүүст мэдрүүлж, аавуудад нэгийг бодогдуулах зорилгыг тээж, “Про стар”-ын хамт олон бүтээсэн байна. Анх кино хийх санааг Т.Даваасүрэн агсны эхнэр Д.Амаржаргал гаргажээ. Тус киноны продюссерээр “Про стар” фильмийн захирал С.Чулуунтогтох ажилласан бол киноны ерөнхий найруулагчаар С.Бүжин ажиллажээ. Харин гол дүрд жүжигчин, найруулагч МУСТА С.Баттулга, “Маск” продакшны жүжигчин Ш.Жавхлан, таван хүүхдийнх нь дүрд И.Мөрөн, Б.Хачиун, Э.Индра, Б.Ариун-Итгэл нараас гадна Т.Даваасүрэн агсны том охин Д.Энхжин тоглосон байна.

Киноны нээлтийн үеэр “Про стар” фильмийн захирал С.Чулуунтогтох “Би хоёр жилийн өмнө Т.Даваасүрэн агсантай уулзаж байсан. Энэ киног хамтын хүчээр хийлээ. Амараа эгчийн таван хүүхдийг хараад өөр дээрээ төсөөлөн бодож, маш их зориг гаргаж хийсэн. Энэ киног үзээд гэр бүлийн нандин зүйл, аз жаргалыг мэдрээсэй гэж хүсч байна. Залуу гэр бүлүүд үзээрэй. Аав гэж хүний нөмөр нөөлөг ямар их байдгийг мэдрэх байх аа” хэмээн даруухан инээмсэглэж байсан. Нэг талаараа  “Про стар” фильмийн захирал С.Чулуунтогтох өөрөө залуу хүн ч гэлээ аль хэдийнэ дөрвөн хүүхдийн аав болчихсон учир үр хүүхдээ гэсэн халуун сэтгэлт аавын амьдралыг дэлгэцэнд мөнхлөх бас нэгэн хөшүүрэг байсан ч байж болох юм.

Тус киноны ерөнхий найруулагч “Про стар” фильмийн захирал С.Чулуунтогтохын дүү С.Бүжин ажиллажээ. Тэрбээр киноныхоо талаар “Энэ кино зохиол бол миний бүрэн хэмжээний анхны зохиол. Амараа эгчтэй наймдугаар сараас хойш өдөр бүр уулзаж, судалгаа хийсэн. Энэ гэр бүлийн амьдрал болоод, Т.Даваасүрэн гэж хүний өдийг хүртэл амьдарсан амьдралыг кино болгох юм бол хүмүүст илүү эерэг, сайхан сэтгэгдэл төрүүлэх юм байна гэж бодсон.

Гурван сар зохиолоо бичсэн. Туршлагатай баг хамт олонтой ажиллалаа. Хөрөг нэвтрүүлгийг нь үзэж байсан. Сошиалаар хүмүүс ер нь мэддэг болчихсон байсан. Эгэл жирийн мөртлөө гайхалтай амьдралыг бүтээсэн хүн байсан” гэлээ. Үүнийг батлах гэсэн мэт үнэхээр ч энгийн даруухан, эгэл жолооч залуугийн элдэв хачир байхгүй элэгсэг сайхан кино болсон гэдгийг кино үзээд гарч буй хүн бүр хэлж байлаа.

Киноны нээлтийн үеэр Т.Даваасүрэн агсны ажиллаж байсан “Улаанбаатар такси Транспорт сервис” ХХК болон "Про стар" фильм хамтран түүний амьд  ахуй цагтаа хөлөглөдөг байсан “12-24” улсын дугаартай автомашиныг талийгаачийн эхнэр Д.Амаржаргалд нь гардуулан өгсөн юм. Тэрбээр “Миний ханийн амьдралаас сэдэвлэн кино хийсэнд үнэхээр их баярлаж байна. Хэлэх үг олдохгүй тулгамдаад баярын нулимас л урсаад байна. Зүгээр л баярлалаа гэж хэлье” гэлээ.

Ийнхүү киноны нээлт баяр хөөр, догдлол, нулимс дүүрэн болж өндөрлөлөө. Ингээд  О.Билэгтөр гэргий М.Баянзул болон хүү Б.Эрхэстэйгээ “Сайн аав” киног үзээд гарч ирсний дараа тэдний сэтгэгдлийг сонслоо. Гэргий М.Баянзул “Сайн аавтайгаа /хань О.Билэгтөр/  "Сайн аав"-ыг үзлээ. Гоё кино болжээ. Сэтгэл их хөдөлж зөндөө уйллаа. Т.Даваасүрэн агсны гэргий, үрсэд нь эрүүл энхийг хүсье. Маш их таалагдсан. Эр хүн, эцэг хүн, хань хүн тийм л байдаг байх гэсэн сэтгэл төрсөн. Үзэхээс өмнө ханийгаа өөр нүдээр, өөр сэтгэлээр харж байсан юм.

Харин одоо их сайхнаар, ухаалгаар бас ямар уужуу сайхан, энэрэнгүй юм бэ гэдгээр харах боломж олгосон. Бидэнд дурсагдах ийм сайхан мөчүүд хэр билээ гэж бас битүүхэн “хэрвээ” гэсэн бодол цухасхан орж ирсэн. Тэр үед бид байгаадаа сэтгэл хангалуун хайраар л дүүрэн байх ёстойгоо, бас эрүүл байхыг л хүсэх боллоо. Сайхан кино болсон байна. Олон гэр бүлд олон эхнэрүүдэд ухаарал бодол өгөх байх. Үзээрэй ялангуяа залуу гэр бүлүүд. Хүний орчлонд хүн хүнээрээ л дутдаг юм байна. Хайраар л дүүрэн амьдраарай” гэсэн юм.

Үнэхээр эрээнтэй бараантай амьдралын эгэл бор өдрүүд дунд аав тэмцсээр, гэр бүл хань ижил, үр хүүхдүүдийнхээ төлөө зүтгэсээр байсан. Амьдрал амаргүй байсан ч тэр архинд ороогүй, хүсэл мөрөөдөл нь биелээгүй ч тэр гутарч гуниагүй. Хэцүү цагт тэр гэр бүлээ орхиж яваагүй. Яагаад гэвэл түүний амьдралын утга учир нь үр хүүхдүүд, гэр бүл нь байсан. Аавууд юу хүсдэг вэ? Тэр тэрбумтан болох гэж зүтгээгүй. Тэр алдар нэр хөөгөөгүй. Тэр албан тушаалд шунаагүй. Тэр амьдралаас илүүг хүсээгүй. Тэр зөвхөн гэр бүлээ аз жаргалтай байлгахыг л хүссэн. Нөмөр нөөлөг, түшиг тулгуур, хайр халамж, сэтгэл зүрх, тэр бол “Сайн аав”. Тэр хүссэндээ хүрч чадах болов уу. Түүний эгэл даруухан амьдрал залууст ямар их ухаарал хайрлаж болохыг энэ киноноос үзээрэй.