БНХАУ-ын иргэд 30 хоногийн хугацаатай Монгол Улсад визгүй зорчих гэж байгаа талаар Асашёорюү Д.Дагвадорж аварга твиттер хуудсандаа мэдээлсэн. Харин үүний дараа ГХЯ-наас эрс үгүйсгэж, ор үндэслэлгүй мэдээлэл түгээсэнд харамсаж байгаагаа илэрхийлж байлаа. Гэвч Аса аваргын түгээсэн мэдээлэл ор үндэслэлгүй биш гэдгийг БОАЖ-ын сайд Д.Оюунхорол баталжээ.

Тэрбээр Эдийн засгийн байнгын хорооны хурлын үеэр  “Одоогоор хэчнээн улс манайд визгүй зорчиж байгаа вэ. Зарим улсын иргэдийн визгүй зорчих эрхийг Засгийн газар цуцалсан байсан. Энэ эргээд аялал жуулчлалыг хөгжүүлэхэд саад болох юм биш үү” гэсэн Л.Болд гишүүний асуултад хариулахдаа Хятадын иргэдийг визгүй зорчуулах асуудлыг ярилцаж байгаа талаар хэлсэн юм.

Д.Оюунхорол сайд “Одоогоор 42 улсын иргэнийг аялал жуулчлалын зорилгоор Монгол Улсад визгүй зорчуулах Засгийн газрын шийдвэр 2014 онд гарсан. Засгийн газар сая хуралдаад эдгээр 42 улс дээр нэмж хил орчмын аялал жуулчлалаар жуулчлах гадаадын иргэдийг визгүй зорчуулахаар ярилцсан. Үүнд БНХАУ-ын иргэд багтана. БНХАУ-ын иргэд аялал жуулчлалын зорилгоор орж ирэх тохиолдолд визгүй зорчдог байх асуудлыг шийдвэрлэхээр БОАЖЯ болон ГХЯ ажиллаж байна” хэмээн ярьсан юм.