Өнөөдөр Төрийн ордонд УИХ-ын гишүүнээр сонгогдсон 76 хүн нэр дэвшигчийн үнэмлэхээ гардаж авсан юм. Энэ үеэр хамгийн анхаарал татсан нэр дэвшигч нар УИХ-д шинээр сонгогдож буй хүмүүс байв.

Мөн энэ үеэр УИХ-д хоёр дахь удаагаа Сэлэнгийн ард түмний сонголтоор орж ирсэн УИХ-ын гишүүн Д.Эрдэнэбат олны анхааралд байлаа. Учир нь өмнөх сонгуулиар олонхийг бүрдүүлж байсан АН-ынхан өнөө жил цөөнх болж, улмаар Д.Эрдэнэбат намын бүлгээ даргална гэсэн мэдээлэл гарч эхлээд байгаа юм. Тиймдээ ч дараагийн намын дарга, бүлгийн дарга байх уу гэдэг нь яригдаж эхлээд буй түүнээс сэтгүүлчид энэ удаагийн ялагдлын талаарх байр суурийг илүүтэй сонирхлоо.

Д.Эрдэнэбат гишүүн “АН-ын ялагдал биднийг дүгнэх, эргэн харах ажил ихтэй байгааг харууллаа гэж бодож байна. АН-ын есөн гишүүн бүлгээ байгуулна. Бид МАН-ынханд мөрийн хөтөлбөрийг нь өдөр бүр сануулж ажиллах болно. Намаа шинэчлэх цаг ч болсон байна.

Тиймээс намын дарга яаралтай хурлаа хийж үндсэн дүрмээ шинэчлэх ёстой юм. Би үүнийг л намын даргадаа хэлнэ. Мянга мянган залуусын хүлээлт байгаа. намын савлалт аль нэг талдаа байдаг гэдгийг бид өмнө нь харсан. Гэхдээ салхи эргэж байна. Ард түмний 50-иас илүү хувь нь ардчилагчдын талд шүү гэдгийг эрх баригчид өдөр бүр санах биз” хэмээн байр сууриа илэрхийлэв.