БНСУ-ын Намянжү хот, Монгол Улсын нийслэл Улаанбаатар хот хооронд найрамдалт харилцаа тогтоосны 20 жилийн ой энэ онд тохиож байгаа ажээ. Энэ хугацаанд хоёр хот соёл урлаг болон бусад салбарт хамтын ажиллагаатай явж ирсэн түүхтэй. Намянжү хотод манай улсын соёл урлагийг сурталчилсан соёлын хотхон байдаг байна. Уг хотхонд жил бүр Монголоос уран бүтээлчид очиж, урлагийн тоглолт хийдэг уламжлалтай аж. Энэ жилийн тоглолтод оролцох уран бүтээлчдийн сонгон шалгаруулалт өнөөдөр эхлэх гэж байна. Үүнтэй холбоотойгоор Намянжү хот, Улаанбаатар хот болон UBS телевиз гэсэн гурван тал хамтын ажиллагааны гэрээнд гарын үсэг зурлаа.

Энэ үеэр Нийслэлийн Соёл урлагийн газрын дарга Ж.Дамдинцэрэн “Нийслэлийн соёл урлагийн газраас зарласан энэ удаагийн сонгон шалгаруулалтад нийт 120 гаруй уран бүтээлч бүртгүүлээд байна. Үүн дотор Намянжү хотод өмнөх жилүүдэд болсон тоглолтод оролцож байсан ч уран бүтээлч бий, анх удаа бүртгүүлсэн хүн ч олон бий. Бид сонгон шалгаруулалт зарлахдаа төрөл заагаагүй. Үндэсний хөгжмийн бүх төрлөөр бүртгэсэн. Дээр нь Намянжү хотод байдаг соёлын хотхонд зөвхөн хөгжимчдийн уран бүтээл тавигддаггүй. Морин үзүүлбэр бас бий. Тиймээс 10 гаруй уран бүтээлчтэй морин циркийн үзүүлбэр үзүүлнэ. Энэ жил бид шүүгчдийн бүрэлдэхүүнээ мэргэжлийн багш, судлаач, хөгжмийн зохиолчдоор бүрдүүлсэн. Энэ сарын 15, 16-ны өдөр Соёлын төв өргөөнд сонгон шалгаруулалт явагдана” гэв.

Харин Намянжү хотын Соёл, аялал жуулчлалын газрын дарга Жон Хэ Гён “Манай хотод байрладаг Монголын соёлын хотхонд Чингис хаанаас эхлээд хаад, үндэстэн угсаатны зан заншил, түүхийг харуулсан үзэсгэлэнгийн танхим байдаг. Үүнээс гадна монгол ардын дуу, бүжиг, хөгжим зэргийг үзүүлдэг язгуур урлагийн тоглолтыг жил бүр тогтмол найман сарын хугацаанд явуулдаг. Энэ жилийн тоглолт дөрөвдүгээр сарын дундаас арваннэгдүгээр сарыг дуустал явагдана” хэмээн онцолсон юм.