Энэ долоо хоногт нийгмийн анхааралд байсан хэд хэдэн томоохон хэргүүдийг шүүх хурал болж байна. Өчигдөр төрөөс олон тэрбумын тендер хууль бусаар авсан гэх хэрэгт холбогдон шалгуулж байсан Г.Дэнзэн, УИХ-ын гишүүн асан Я.Батсуурь нарын хүмүүст холбогдох хэргийн шүүх хурал болж Г.Дэнзэнд оноосон ялыг хөнгөрүүлж 3.6 жилийн хорих ял оногдуулсан бол өнөөдөр дөрвөн настай охиноо онц хэрцгийгээр зодож хөнөөсөн төрсөн эцэг Т.Цогт болон хойд эх Г.Маралмаа нарт холбогдох хэргийг шүүх хурал болж байна.

Хэргийг эргэн сануулвал, Т.Цогт нь гэргий н.Өнөржаргалаас салж Г.Маралмаа гэгчтэй хамтран амьдардаг болсныхоо дараа төрсөн охиноо дэргэдээ авч зодож, улмаар Т.Цогтыг эзгүйд Г.Маралмаа нь дөрвөн настай охиныг эхийнх нь бузар шингэсэн байна хэмээн өөрийгөө удган хэмээж удаа дараа зодож байсан нь илэрсэн.

Охин тархиндаа хүнд гэмтэлтэй ГССҮТ-д хүргэгдэж ирсэн ч удалгүй нас барсан байдаг. Тухайн үед Г.Маралмаа шатнаас унасан хэмээн тайлбар өгч байжээ. Гэсэн ч охин Г.Маралмаа өөрийг нь удаа дараа зодож байсан талаар ээждээ ярьж байсныг нь н.Өнөржаргалын найз олон нийтэд дэлгэснээр хэрэг олны анхааралд орсон юм.

Энэ хэргийг өнгөрөгч онд шийдэж анхан шатны шүүхээс Г.Маралмаад 23, Т.Цогтод 24 жилийн ял оноосон байдаг. Улмаар давж заалдах шатны шүүхийн шийдвэрээр зөвхөн Г.Маралмаагийн ялыг хэвээр үлдээж, Т.Цогтыг ялаас мулталсан. Харин хэрэгтэн Г.Маралмаа энэхүү шийдвэрийг эсэргүүцэж Т.Цогттой холбоотой шинэ баримтуудыг хуулийн байгууллагад өгснөөр хэргийг дахин шалгаж эхэлсэн юм.

Энэ хэргийг шүүх хурал өнгөрөгч сарын 17-нд болох байсан ч хойшилсоор өнөөдрийг хүрчээ. Дашрамд дурьдахад, Г.Маралмаа ч өнгөрөгч онд Т.Цогтын хүүхдийг тээж төрүүлсэн бөгөөд хүүхэд нь одоогоор эгчийнх нь асрамжид байгаа билээ. Төрүүлсэн үрээ онц хэрцгийгээр зодож, улмаар аминд нь хүрчихээд ялаас мултарч дөнгөсөн Т.Цогт гэгчийг монголын шүүх зүгээр суллаад явуулах уу, эсвэл зохих ёсны шийтгэлийг нь өгөх үү гэдгийг хүлээх л үлдлээ.