Японы Шинзо Абэгийн Засгийн газрын Гамшгийн дараах сэргээн босголт хариуцсан сайд Либериал ардчилсан намын үйл ажиллагааны үеэр зүүн Японы гамшгийн дараах бүтээн босголттой холбоотой үг хэлжээ. Ингэхдээ “Цүнами зүүн хойд хэсэгт нүүрлэсэн нь сайн хэрэг” гэж хэлснийхээ төлөө огцорсон байна. Цүнамигийн гамшигт өртөн хайртай дотны хүмүүсээсээ хагацаж үлдсэн хохирогчдын сэтгэлийг эмзэглүүлэх болчимгүй үг хэлснийхээ хариуцлагыг хүлээн тэрбээр огцрохоор шийдэн, өргөдлөө өгчээ.

Харин Ерөнхий сайд Шинзо Абэ түүний өргөдлийг хүлээн авч, ажил царгалдуулахгүй байх үүднээс нэн яаралтай орных нь хүнийг томилох байр суурьтай байгааг “NHK” агентлаг мэдээллээ. Хамгийн сүүлд авсан мэдээллээр Масахиро Имамүрагийн албан тушаалд Либериал Ардчилсан намын улстөрч Масаёши Ёшиног томилжээ.

Сэргээн босголт хариуцсан сайд Масахиро Имамүра энэ сарын 25-ны өдрийн үдэш Либериал Ардчилсан намын үйл ажиллагаанд оролцож, үг хэлсэн байна.

Тухайн үед тэрбээр зүүн Японы гамшгийн дараах бүтээн байгуулалттай холбогдуулан

“Гамшгийн учруулсан хохирлын хэмжээ 25 их наяд иэн. Харин ч зүүн хойд хэсэгт цүнами болсон нь сайн хэрэг шүү. Токиогийн орчимд болсон бол яана. Хохирлын дүн нь 25 их наядаас ч илүү их хэмжээнд гарах байсан байх ” гэж хэлжээ.
Улмаар ам алдвал барьж болдоггүй гэдгийн үлгэрээр дээрх үг хэлснийхээ дараа сайд хэдэнтээ уучлал гуйсан байна. Үүгээр зогсохгүй дараа нь Ерөнхий сайд Шинзо Абэ мөн ижил үйл ажиллагаанд оролцох үедээ “Японы зүүн хойд хэсгийн ард түмний сэтгэлийг  эмзэглүүлэх болчимгүй үг хэлснийх нь төлөө би Ерөнхий сайдынхаа хувиар уучлалт хүсч байна” хэмээн мэдэгдэж, мөн л толгой бөхийлгөн уучлалт хүсчээ.

Гамшгийн дараах сэргээн босголт хариуцсан сайд Масахиро Имамүрагийн үгний алдааг сөрөг хүчнийхэн ч шүүмжилж, байгалийн гамшигт үзэгдлийн хохирогчдыг гомдоох үг хэлснийхээ төлөө сайд огцрох ёстой гэсэн мэдэгдэл гаргажээ. Ийнхүү намын үйл ажиллагаанд хэлсэн болчимгүй үгнийхээ хариуцлагыг хүлээн Масахиро Имамүра сайд огцрох өргөдлөө гаргасан байна. Үүнийхээ дараа тэрбээр сэтгүүлчдэд “Би зүүн хойд нутгийн ард иргэдийн сэтгэлийг эмзэглүүлэх үг хэлсэндээ харамсаж, гүнээ уучлал гуйж байна” гэж ярьжээ.

Сэргээн босголт хариуцсан сайд Масахиро Имамүра Кюүшюүгээс нийтдээ долоон удаа сонгогдсон байна. Эдүгээ 70 насны босго алхсан тэрбээр өнгөрсөн хугацаанд Хөдөө аж ахуй, загас агнуурын яамны дэд сайд, төлөөлөгчдийн танхимын зүүн Японы гамшгийн дараах сэргээн босголт хариуцсан тусгай комиссын даргаар ажиллаж байгаад, шинэ Засгийн газар томилогдоход сэргээн босголтын сайдаар томилогджээ.

2011 онд Японы зүүн этгээдэд болсон гамшгийн улмаас 15893 хүн амиа алдаж, 2553 хүн сураггүй болсон юм.