Хууль зүй, дотоод хэргийн салбарын “Нээлттэй хаалганы өдөрлөг" энэ сарын 17-18-ны өдрүүдэд Чингисийн талбайд болж байгаа билээ. Энэхүү нээлттэй хаалганы өдөрлөгөөр Хууль зүй, дотоод хэргийн сайдын эрхлэх асуудлын хүрээний харьяа 11 агентлаг, байгууллага нийт 50 орчим төрлийн үйлчилгээг иргэдэд газар дээр нь олгож байгаа юм.

Тухайлбал, Шүүхийн шийдвэр гүйцэтгэх ерөнхий газраас маргааш өдрийн "Нээлттэй хаалганы өдөрлөг"-өөр иргэдэд архивын лавлагаа тодорхойлолт, хуулбарыг шуурхай олгох, суллагдсан хүмүүжигчдийн тодорхойлолт гаргаж өгөх, жирийн дэглэмтэй хорих ангид ял эдэлж буй хүмүүжигчдийн ар гэрийнхнийг нь утсаар яриулах, өргөдөл, гомдол хүлээж авах, өр төлбөртэй эсэх лавлагааг үнэ төлбөргүй олгох зэрэг үйлчилгээ үзүүлэхээс гадна Шүүхийн шийдвэр гүйцэтгэх байгууллагад ажилд орох болон сургалтын үйл ажиллагааны талаар иргэдэд мэдээлэл өгөх аж. Мөн хүмүүжигчийн гар урлалын бүтээлийг танилцуулж, худалдан борлуулах үйл ажиллагааг зохион байгуулах юм байна.

Тэгвэл яг одоо Төв талбайд ХЕГ-ын нээлттэй өдөрлөг болж байгаа бөгөөд Хил хамгаалах ерөнхий газрын хувьд хилийн зурвас бүсэд нэвтрэх зөвшөөрөл олгохоос гадна архивын бүх төрлийн үйлчилгээ, өргөдөл гомдол, байгууллагын хүний нөөц болон боомтын талаар мэдээлэл, зөвлөгөө өгч байна. Мөн гэрээт хилчний талаар тодорхой ойлголт өгч хугацаат цэргийн алба хаагчидтай утсаар яриулах, хил нэвтэрсэн лавлагаа олгох зэрэг үйлчилгээ явуулж байгаа юм байна. Цагдаагийн Ерөнхий Газрын нээлттэй хаалганы өдөрлөг маргааш болох бол өнөөдөр Замын цагдаагийн газраас иргэдийн жолооны үнэмлэхийг хэвлэж өгөх, жолооны үнэмлэх авах бүртгэлийг хийж байгаа аж. 

Б.Тогтох