АНУ-ын Ерөнхийлөгч Доналд Трампын гэргий тэргүүн хатагтай Мелани Трамп, 11 настай хүү Баррон Трамп нар энэ зун Цагаан ордон руу нүүх гэнэ.

Өнгөрөгч нэгдүгээр сарын 20-нд Д.Трамп Ерөнхийлөгчийн тангаргаа өргөн Цагаан ордонд нүүж очсон билээ. Гэвч, Мелания хүүгээ сургуулиас нь завсардуулахгүй гэх шалтгаанаар Нью-Йоркийн Манхаттан дахь гэртээ үлдсэн байдаг.

Тэгвэл энэ зун Тэргүүн хатагтай Цагаан ордон руу нүүх бөгөөд хүү Баррон Трамп нь хувийн дунд сургуульд шилжин суралцахаар болсон байна.

Гэхдээ одоогоор яг хэзээ нүүх нь тодорхойгүй байгаа аж.  Энэ хичээлийн жил ирэх сарын сүүлчээр дуусна. Харин  Баррон 2017-2018 оны хичээлийн жилд Гэгээн Андрьюгийн Эпископал сургуульд есдүгээр сарын 5-наас эхлэн суралцах гэнэ. Тус сургуульд өмнө нь Ерөнхийлөгчийн хүүхэд сурч байсан тохиолдол үгүй аж.