Венесуэлд Ерөнхийлөгч Николас Мадурог огцрохыг шаардсан эсэргүүцлийн жагсаал дахин зохион байгуулагдаж,  200 гаруй мянган хүн оролцжээ. Эдүгээг хүртэл газрын тосны арвин их нөөц баялагтай атлаа эдийн засгийн хямралд өртөж, өргөн хэрэглээний барааны хомсдолд орсон тус улсын иргэд Засгийн газраа эсэргүүцсэн хэд хэдэн удаагийн эсэргүүцлийн жагсаалыг Каракас хотод зохион байгуулаад байгаа юм.

Жагсаалыг цагдаагийнхан хүчээр тарааж буй бөгөөд ингэхдээ нулимс асгаруулагч хий ашиглаж байгаа аж. Харин тэдний эсрэг жагсагчид чулуу, галтай лонх шидэн эсэргүүцэл үзүүлж байна. Зохион байгуулагчдын мэдээлснээр зөвхөн Каракаст болсон жагсаалд 160 мянган хүн оролцсон бол Тачира, Сан Кристоболд болсон жагсаалд 40 мянга гаруй хүн оролцсон байна.

Венесуэлийн Ерөнхийлөгч Николас Мадуро өнгөрсөн долоо хоногт хүчирхийлэл, түрэмгийллийг зогсоох зорилгоор тус муж руу 2600 цэргийн албан хаагчийг илгээсэн байна. Цуврал жагсаал эхэлснээс хойш энэ удаагийнх 50 дахь нь. Энэ хугацаанд хэд хэдэн удаагийн мөргөлдөөн гарч, 47 хүн нас барж, 2200 хүн баривчлагджээ.

Б.Даваа