БНХАУ-ын дарга Ши Жинпин өчигдөр Хонконгод айлчиллаа. Энэ онд Хонконгийг Умард Ирландын нэгдсэн вант улсаас БНХАУ-д шилжүүлсний 20 жилийн ой тохиож буй бөгөөд тус тэмдэглэлт ойн үйл ажиллагаанд оролцохоор Ши Жинпин гэргийн хамт  айлчлал хийж байна.

БНХАУ-ын төрийн тэргүүний тухайд өнөөгийн албан тушаалдаа томилогдсоноос хойш анх удаагаа Хонконгод айлчилж буй нь энэ юм. Ши Жинпин, түүний гэргий Пэн Лиюан нар “Эйр Чайна” онгоцоор Хонконгийн олон улсын нисэх онгоцны буудалд өчигдөр газардсан бөгөөд түүнийг хөгжимчид болон тавтай морилон саатахыг хүсэн ерөөсөн үгнүүдийг бичсэн лоозон, БНХАУ-ын далбааг барьсан хүүхэд багачууд угтан авсан байна. Үүний дараа Ши Жинпин нисэх онгоцны буудалд богино хэмжээний мэдэгдэл хийгээд амжжээ. Тэрбээр “Есөн жилийн дараа Хонконгийн эх газарт саатаж байна. Сэтгэл үнэхээр өндөр байна. Миний зүрх сэтгэлд үргэлж Хонконг байсаар ирсэн” гэжээ.

Түүнчлэн, БНХАУ-ын Засгийн газар цаашдаа ч Хонконгод тусалж дэмжиж байхаа илэрхийлсэн аж.

Ши Жинпин Хонконгод гурван өдрийн хугацаатай айлчлал хийхээр төлөвлөсөн бөгөөд маргааш нутаг буцах юм. Хонконг нь  Хятадын өмнөд хэсэгт оршдог билээ. Тус улс 1942 оноос 1997 онд Хятадад шилжүүлэгдэх хүртлээ Их Британийн  засаг захиргаанд  байжээ.  Хятад-Британийн хамтарсан тунхаг болон Хонконгийн Үндсэн хуульд зааснаар шилжүүлгээс тавин жилийн дараа буюу доод тал нь 2047 он хүртэл Хонконг нь Хятадаас автономит байдалтай байх ёстой юм.

Энэ оны тухайд БНХАУ-ын тусгай засаг захиргааны нэгж болсноос хойш 20 жилийн ойгоо угтаж буй Хонконг тусгаар тогтносон улс болоход дахиад 30 жил үлдлээ.  Ши Жинпин 20 жилийн ойн үйл ажиллагаанд оролцох сургаар Хонконгийн ардчиллын төлөөх “шүхэрт хувьсгалчид” ч зүгээр суусангүй. Хятадын харьяанд эргэн ирснийг тохиолдуулан Бээжингийн зүгээс Хонконгт бэлэглэсэн хөшөөний өмнө 2014 онд ардчилсан сонгууль хийхийг шаардан эсэргүүцлийн жагсаал хийж байсан оюутан болон Хятадын Засгийн газрын эсэргүүцдэг улс төрийн намын гишүүд нийлсэн 20 орчим хүн мягмар гарагийн орой суулт хийжээ.

Тэд ардчиллыг дэмжихийг шаардахаас гадна, нобелийн энх тайвны шагналт зохиолч Лю Сяобог ямар нэгэн болзолгүйгээр суллахыг Бээжингийн эрх баригчдаас шаардсан байна. Элэгний хорт хавдартай гэж оношлогдсон Нобелийн шагналтныг саяхан батлан даалтаар түр суллааад байгаа юм. Цагдаа нар эсэргүүцлээ илэрхийлэгчдэд хэдэн цагийн турш хяналт тавьж, хөшөө рүү авирсан хүмүүсийг баривчилсан байна.

БНХАУ-ын төрийн тэргүүнүүд дундаас 2012 онд Ху Жинтао тус улсад айлчилж байжээ. Тухайн үед Хонконг Хятадын харьяанд дахин ирсний 15 жилийн ой тохиож байсан бөгөөд хэдэн зуун мянган иргэд эсэргүүцлийн жагсаал хийж, улс төрийн шинэчлэлтийг шаардаж байсан байна.