Швейцарийн цагдаагийн алба хаагчид Альпийн нуруунд 30 жилийн өмнө авираад ор сураггүй болсон Германы уулчны цогцсыг мөсөн голоос олсон талаар олон нийтэд мэдээлжээ.

Тус мэдэгдэлд дурьдагдсанаар, цогцсыг Швейцарын өмнөд этгээдэд байрлах Lagginhorn ууланд авирч явсан хоёр уулчин олсон байна. Тэд уулын оргил өөд хэдэн зуун метрт авираад түр амсхийх явцдаа хүний гар, гутал байхыг олж харжээ. Тухайн үед цаг агаарын нөхцөл байдал тааруу байсан тул цогцсыг тээвэрлээгүй байна. Харин маргааш нь аврагчид ирж, нисдэг тэргээр цогцос болон эд хэрэглэлийг зөөж, талийгаачийн хэн болохыг нь тодруулахын тулд нийслэл Берны эмнэлэгт хүргэсэн байна.

Улмаар шинжилгээний үр дүнд цогцос 1943 онд төрж, 1987 оны наймдугаар сарын 11-ний өдөр ор сураггүй болсон Германы уулчных болохыг нь тогтоожээ.