ШӨХТГ-ийн дарга Д.Мөнхтөр Улаанбаатар төмөр зам, Түргэн тусламжийн 103 төвд хийсэн хяналт шалгалтын талаар сэтгүүлчдэд өнөөдөр мэдээлэл хийлээ. Тус газарт “Богд төмөр”, “Ерөө гол” компаниуд Улаанбаатар төмөр зам компани тарифаа нэмж байна гэх гомдол гаргасан байна. Гомдлын дагуу шалгахад,  Улаанбаатар төмөр зам компанийн дарга 2016 оны зургадугаар сарын 20-нд “Тарифын нэгдүгээр мөрдлөгт өөрчлөлт оруулах тухай” А/196 тоот тушаал гаргаж, воганы хоосон гүйлтийн тарифыг нэмэгдүүлж, 2016 оны долдугаар сарын 1-ний өдрөөс эхлэн мөрдүүлэх шийдвэр гаргасан байсан илэрчээ.

 Иймд тус компанийг өнгөрсөн оны нийт орлогын гурван хувьтай тэнцэх хэмжээний буюу 1.8 тэрбум төгрөгөөр торгохоор болсон тухай мэдэгдсэн юм. Энэ тухай ШӨХТГ-ийн дарга Д.Мөнхтөр “Манай байгууллагын хурлаар Улаанбаатар төмөр зам компани зүй ёсны монопол байдалтай аж ахуйн нэгж болох нь тогтоогдсон. Монопол буюу давамгай байдалтай аж ахуйн нэгжүүд үнэ тарифын өөрчлөлт оруулах бол заавал манай байгууллагаас зөвшөөрөл авах ёстой байдаг.

Гэтэл тус компани зөвшөөрөл авалгүйгээр тарифаа нэмсэн. Тиймээс 2015 оны нийт орлогын гурван хувь буюу 1.8 тэрбум төгрөгөөр торгоно. Бид Улаанбаатар төмөр зам компанид торгуулийн мэдэгдэх хуудсыг өчигдөр явуулсан” гэв.

Мөн энэ үеэр түргэн тусламжийн 103 төвд хийсэн шалгалтын дүнг мэдэгдсэн юм. Шалгалтын явцад түргэний машиндGPS байдаггүй болох нь илэрчээ. Түүнээс болж машинууд хаана явж байгаа нь мэдэгддэггүй бөгөөд хэрэглэгчдэд хүлээгдэл үүсэх, ирсэн дуудлагад хүрч ажиллаж чадахгүй байх зэрэг зөрчил илэрдэг байна.