Коронавирусээр өвчилсөн хүмүүсийн тоо дэлхийн хэмжээнд 2700-г давж, 80 хүн нас барчихлаа. Дэлхий нийтийг цочроосон уг вирусийн халдвар манай урд хөршөөс гарсан. Тархалж маш хурдацтай байгаа. Манайх хил залгаа, иргэд нь визгүй зорчдог гэдэг утгаараа хамгийн эрсдэлтэй бүсэд хамаарч байгаа.

Хэдийгээр манай улсад албан ёсоор бүртгэгдээгүй ч энэхүү вирус орж ирэх эрсдэл өндөртэй учир хүн бүр хичээх, сэрэмжтэй байх ёстой. Уг вирусээс урьдчилан сэргийлэх зөвлөмжийг мэргэжлийн байгууллагуудаас байнга өгч байгаа ч амны хаалт хомдолтой байгаа, зарж байгаа газрууд нь өөрсдөө дур мэдэн үнээ нэмж байгаа гэх сөрөг мэдээлэл их байна.  

Амны хаалт гэхээр өчүүхэн зүйлийн тухай ярьж байгаа мэт боловч яг энэ цаг үед хамгийн чухал хамгаалалт бол амны хаалт шүү дээ. Тиймээс Эрүүл мэндийн яам энэ асуудалд анхаарлаа хандуулж, амны хаалтыг үнэгүй тараах, хүмүүст амны хаалтыг заавал зүүж хэвших тал дээр суртал сурталчилгааг түлхүү өгөх хэрэгтэй байна.

Мөн үндэсний үйлдвэрлэгчид нийгмийн хариуцлагынхаа хүрээнд амны хаалтыг хийж зах зээлд нийлүүлэх хэрэгтэй байна.

Цөөхөн ч гэсэн хэд хэдэн газар амны хаалтыг үнэгүй тарааж байгаа гэх сайшаалтай мэдээлэл олон нийтийн сайшаалыг хүртэж байна. Гэхдээ сайны хажуугаар саар гэгчээр үнээ өсгөн зарах, маск дууссан хэмээн хиймэл хомсдол бий болгох зүйл олон байгааг иргэдийн сэтгэгдлээс харж болохоор байна.

Тиймээс Эрүүл мэндийн яам энэ асуудалд анхаарлаа хандуулж, өөрсдөө амны хаалтыг үнэгүй тарааж иргэдийг амны хаалтаар хангах ажлыг эрчимжүүлмээр байна.

Нөгөөтэйгүүр амны хаалтны үнийг өсгөж, хиймэл хомсдол бий болгож байгаа аж ахуйн нэгжүүдэд хариуцлага тооцох хэрэгтэй.