Улсын Их Хурлын сонгуулийн 18, 28 дугаар тойрогт явагдах нөхөн сонгуульд оролцох 8 нам, нэг эвслийн 12 нэр дэвшигч, бие даан нэрээ дэвшүүлсэн 2 нэр дэвшигчийг бүртгэж, үнэмлэх олгохоор шийдвэрлэсэн. Харин гурван нэр дэвшигчийг бүртгэхээс татгалзаад байсан юм.

Монгол Улсын Их Хурлын сонгуулийн 18 дугаар тойрогт явагдах нөхөн сонгуульд Иргэний зориг ногоон намаас нэр дэвшүүлсэн А.Бархүү, Шударга иргэдийн нэгдсэн эвсэл намаас нэр дэвшүүлсэн Д.Баатаржав нарын дахин бүртгүүлэх хүсэлтийг хүлээн авч, нэр дэвшигчээр бүртгэн үнэмлэх олгохоор болжээ. Монгол Улсын Их Хурлын сонгуулийн тухай хуульд заасны дагуу нэр дэвшигчээр бүртгэхээс татгалзсан тохиолдолд санал авах өдрөөс 25-аас доошгүй хоногийн өмнө зөрчлийг арилгасны үндсэн дээр дахин бүртгүүлэхээр шаардагдах баримт бичгийг ирүүлэх, мөн өдрөөс өмнө өөр хүнийг нөхөн нэр дэвшүүлэх боломжтой байдаг. Энэ хугацаанд хоёр нэр дэвшигч дахин бүртгүүлэхээр Сонгуулийн ерөнхий хороонд холбогдох баримт бичгээ ирүүлснийг тус Хороо өнөөдөр хуралдаанаар хэлэлцэн шийдвэрлэжээ.

Ийнхүү Монгол Улсын Их Хурлын 18, 28 дугаар тойрогт явагдах нөхөн сонгуульд нийт 16 нэр дэвшигч бүртгүүлсэн байна. Нэр дэвшигчдийн үнэмлэхийг 2021 оны 9 дүгээр сарын 18-ны өдөр гардуулах бөгөөд нэр дэвшигчийн үнэмлэх олгосноор сонгуулийн сурталчилгаа албан ёсоор эхэлнэ.

Нэр дэвшигчид:

18 дугаар тойрог

Монгол ардын намаас Цагаанхүүгийн ИДЭРБАТ
Ардчилсан намаас Батхүүгийн ГАРАМГАЙБААТАР
Иргэний зориг ногоон намаас Алтанхуягийн БАРХҮҮ
Ард түмний олонхийн засаглал намаас Дэнзэнгийн ЧУЛУУНБАТ
Шударга иргэдийн нэгдсэн эвсэл намаас Дамбадондогийн БААТАРЖАВ
Бие даан нэр дэвшигч Магнайбаярын ЧИНГИСХААН

28 дугаар тойрог

Монгол ардын намаас Энхбаярын БАТШУГАР
Ардчилсан намаас Эрдэнийн БАТ-ҮҮЛ
Иргэний зориг ногоон намаас Шагдарсүрэнгийн ГАНТУЛГА
"Зөв хүн Электорат эвсэл"-ээс Бадрахын НАЙДАЛАА
Эрх чөлөөг хэрэгжүүлэгч намаас Шоовдорын ТӨМӨРСҮХ
Үнэн ба Зөв намаас Аюурзанын ОТГОНБААТАР
Дэлхийн Монголчууд намаас Логийн ЦОГ
Ард түмний олонхийн засаглал намаас Алтанцэцэгийн БАТДОРЖ
Шударга иргэдийн нэгдсэн эвсэл намаас Цэндсүрэнгийн ГАНТУЛГА
Бие даан нэр дэвшигч Хадбаатарын БАТ-ЯЛАЛТ