Коронавирусийн халдвараар өвчилсөн жирэмсэн эхчүүдэд үүсч буй сөрөг нөлөөлөл, хүндрэлээс урьдчилан сэргийлэх талаар Хан-Уул дүүргийн нэгдсэн эмнэлгийн эх барих, эмэгтэйчүүдийн хяналтын эмч Х.Хулантай ярилцлаа.

-Жирэмсэн эхчүүд коронавирусийн халдвар авч өвчилсөн тохиолдолд ямар хүндрэл гарч байна?

-Коронавирусээр өвчилсөн болон өвдөөд эдгэрсэн жирэмсэн эхчүүд зүрх дэлсэх, ядарч сульдах, хатуурал өгөх зовиур илэрч байгаа. Жирэмсний эрт хугацаанд цус алдах,  доошоо тонус өгөх, өсөлтгүй болох тохиолдол цөөн гарсан. Гэхдээ хөнгөн, хүнд туссан болон тухайн хүний биеийн онцлогоос шалтгаалж өөр, өөр байна. Мөн эдгээр зовуурь нь коронавирусээс шалтгаалсан гэж шууд тодорхойлох нь өрөөсгөл.

-Тэгэхээр ихэвчлэн жирэмсний бага тээлттэй буюу эрт үед хүндрэл үүсч байгаа гэсэн үг үү?

-Одоогийн байдлаар энэ талаар ДЭМБ, ЭМЯ-наас судалсан тодорхой судалгаа, баталгаа байхгүй учир коронавирустэй холбоотой гэж үзэх нь өрөөсгөл, ташаа ойлголт болно.

-Халдвараар өвчлөхөд эхийн биеэс гадна ургийн өсөлт, хөгжилтөд нөлөөлсөн тохиолдол гарсан уу. Иргэдийн дунд вакцины улмаас ураг амьгүй болох, өсөлт зогсох хүндрэл үүсч байна гэсэн мэдээлэл гараад байна?

-Коронавирусээр өвчилж эдгэсний дараах сөрөг үр дагавар ч юм уу, коронавирусийн эсрэг дархлаажуулалтын улмаас ургийн өсөлт, хөгжилтөд сөргөөр нөлөөлж, амьгүй болсон, зулбасан эсэх талаар батлагдсан үр дүн, судалгаа байхгүй. Жирэмсэн эхчүүд батлагдаагүй мэдээлэлд итгэж айж, стресстэх тохиолдол цөөнгүй гарч байна. Тиймээс жирэмсэн эхчүүд ургийн гажиг үзүүлэх шинжилгээ өгч болно. Энэ нь жирэмсний эхний гурван сард ургийн хромсом генийн гажгийг үздэг шинжилгээ юм. Эрт илрүүлгийн шинжилгээнүүдээ өгөөд хэвийн гарсан бол ямар нэгэн байдлаар айж, сандрах зүйлгүй эмчийн хяналтад ороод үзүүлээд явах хэрэгтэй. Жирэмсний таван сартайгаас хойш коронавирусээр өвчлөхөд урагт гажиг үүсгэх магадлал харьцангуй бага гэж үзэж байгаа. Учир нь эхний таван сард ургийн анатоми, эрхтэн тогтолцоо үүсэж хөгжөөд бүрэлддэг. Түүнээс хойш массаараа л жин нэмж байгаа учраас гажиг үүсэх нь харьцангуй бага юм.

-Хүндрэлээс хэрхэн урьдчилан сэргийлэх вэ.

-Жирэмсэн эхчүүд халдвар хамгааллын дэглэмээ сайн сахиж олон нийтийн газраар зорчихгүй байх хэрэгтэй. Өвчлөхөөс өмнө урьдчилан сэргийлэх нь хамгийн чухал. Мөн дархлаагаа дэмжиж витамин С,D ууж цэвэр агаарт байх хэрэгтэй. Дархлаа дэмжихэд хооллолт чухал байдаг учраас аарц, чацаргана, адууны шөл, уламжлалт хоолоо сайн идэхийг зөвлөж байна. Одоогийн байдлаар цар тахлын халдвар эрсдэл өндөр байгаа тул олон нийтийн газраар зорчихгүйгээр гэртээ өөрийгөө тусгаарлах нь халдвар авах, авсанаас гарах эрсдэл, хүндрэлийг бууруулах оновчтой арга юм.

-Коронавирусийн халдвараар өвчлөөд эдгэсэн ч халдварын дараах хам шинж нь зургаан сарын хугацаанд үргэлжилж байгаа. Үүнд ямар зөвлөгөө өгөх вэ?

-Өвчлөөд эдгэсний дараа толгой өвдөх, ядрах шинж тэмдэг илэрч байгаа. Жирэмсэн болохоос өмнө гэр бүл төлөвлөлтөө сайн хийх хэрэгтэй. Хэрэв жирэмсэн болохоор төлөвлөсөн бол коронавирусээр өвчлөөд эдгэрснээс хойш зургаан сар дотроо жирэмслэлтээс хамгаалах нь зүйтэй гэж зөвлөж байна. Ер нь ерөнхий биеийн байдал муу, хожуу жирэмсэлсэн, архаг хууч өвчтэй хүмүүст хам шинж өгөх тохиолдол өндөр байна. Ялангуяа 35-аас дээш насны жирэмсэн, архаг хууч өвчтэй, дотор эрхтэн тогтолцооны өвчтэй хүмүүс хожуу хордлого өгөх тохиолдол гарч байна. Жишээлбэл, даралт ихсэх өвчтэй хүнд хавагнах, шээсээр уураг алдах зэрэг гурван шинжээр хожуу хордлогын шинж тэмдэг илэрдэг. Тэгэхээр жирэмсэн эмэгтэйчүүд хэрэв архаг хууч өвчтэй бол нарийн мэргэжлийн эмчдээ давхар хянуулах хэрэгтэй. Жирэмсэн эхчүүдэд гарч буй нийтлэг хам шинжийн хувьд зүрх дэлсэх, толгой өвдөх зэрэг энгийн хүмүүстэй адил шинж илэрч байгаа. Ноцтой хүндрэл өгөөгүй бол хэвийн төрнө. Төрөлтийн үед коронавирусийн хам шинжээс үүдэлтэй гарсан эрсдэл байхгүй.

-ЭМЯ-ны зүгээс коронавирусээр халдварласан болон өвдөөд эдгэсэн жирэмсэн эхчүүдийн эмчилгээ, хяналтад зориулсан тусгай зөвөлгөө, заавар гаргасан уу?

-Урьдчилан сэргийлэх зөвлөмж, зааврууд энгийн иргэдтэй адилхан нэг удирдамжаар явж байна. Ер нь жирэмсэн эхчүүд коронавирусээр халдварласан нь батлагдсан бол хэвтэн эмчлүүлэхийг зөвлөж байгаа. Жирэмсэн эхчүүд ч хэвтэх сонирхолтой байна. Хэрэв эмнэлгийн байгууллагад хэвтэн эмчлүүлэх нь халдвар авах эрсдэлтэй гэж үзвэл өөрийн хүсэлтээр гэртээ эмчилгээ хийлгэж болно.

Эх сурвалж: “Зууны мэдээ” сонин

2022 ОНЫ  НЭГДҮГЭЭР САРЫН 19. ЛХАГВА ГАРАГ. № 13 (6745)