Өчигдөр буюу хоёрдугаар сарын 17-ны өдөр ТЕГ-аас иргэн Ч.Мөнхбаярыг саатуулах ажиллагаа явуулж, 15.30 цагийн орчимд Сүхбаатар дүүрэгт байршилтай буюу Энхтайваны гүүрний дэргэдэх "Наран" плазагийн ойролцоо газраас барьж саатуулсан. Харин орой нь Ч.Мөнхбаярын гэрт нэгжлэг хийсэн.

Иргэн Ч.Мөнхбаярын дансанд гаднаас их хэмжээний ам.долларын шилжүүлэг хийгдсэн гэх мэдээлэл байгаа юм. Уг асуудалтай холбоотой мэдээллийг ТЕГ өглөө. 

ТЕГ-ын Олон нийттэй харилцах албаны ажилтан П.Өгөөмөр "Болсон үйл явдалтай холбоотойгоор хэвлэл мэдээллийн байгууллага албан ёсны мэдээлэл өгөх хүсэлтийг удаа дараа тавьсан. Тиймээс үйл явдалтай холбогдуулан прокурорын байгууллагаас зөвшөөрсөн хүрээнд товч мэдээлэл өгнө. Монгол Улсын иргэн Ч.Мөнхбаяр нь гадаадын тагнуулын байгууллагын үүрэг даалгавар, санхүүжилтээр үйл ажиллагаа явуулж, хууль бусаар хамтран ажилласан гэх нөхцөл байдал тогтоогдсон учир өчигдөр тагнуулын байгууллагын зүгээр арга хэмжээ авсан. Тус баривчилгаа, үзлэг нэгжлэгийн ажиллагааг хуулийн хүрээнд хэрэгжүүлсэн. Иргэн Ч.Мөнхбаяр нь гадаадын тусгай алба байгуулан, гаднын байгууллагатай багагүй хамтран ажиллах бөгөөд мөнгөн тусламж тогтмол байсан. Энэ нь өчигдөр илэрсэн. Түүний гэрээс их хэмжээний бэлэн мөнгө, валют илрүүлэн хураан аваад байна" гэлээ. 

Ч.Мөнхбаяр “Монгол хүн Монгол хүндээ тусалъя” ТББ-ын тэргүүн бөгөөд Хазара иргэдийг эх оронд нь ирүүлэх талаар хэвлэлийн бага хурал хийж мэдэгдэж байсан билээ. Мөн Хятадын "Wechat" сүлжээнд өвөрмонголчуудыг хил нэвтрүүлэх талаар тусална зэргээр бичдэг байсан гэх мэдээлэл байна.