Өнөө цагт худалдааны төв, банк санхүүгийн байгууллагууд эрх нь биш цаг үеэ дагаад тоног төхөөрөмж нь сайжран касс, теллерүүд нь иргэдэд хурдан шуурхай үйлчлэх боломж нөхцөл нь бүрдсэн, сүлжээнд холбогдсон. Захын банк 5-6 теллер, УИХ, E-mart зэрэг томоохон худалдааны төвүүд 10 гаруй кассын аппараттай.

Харамсалтай нь эднээс эзэнтэй байж иргэдэд үйлчилдэг нь байгаагаасаа хамаагүй цөөн болж хэд гуравхан  цэг дээр иргэдийн урт дараалал үүсэх нь энүүхэнд.

Банк гэхэд л сайндаа хоёр гуравхан теллер сууж байх нь бий. Иргэд болохоор өөр өөрийн ажилтай, өдөр оройн хоол, хүнсний зүйлээ үдийн цайныхаа цагаар цуглуулж, банк, худалдааны төвөөр үйлчлүүлэх гэж орох нь бий. Угаасаа амь зуухын тулд бас нэг ажил алба хашиж байгаа юм болохоор цаг зав нь тэгэж л таардаг. Гэтэл яг энэ үеэр энэ үйлчилгээний байгууллагуудын  теллер, кассын ажилтнууд нь үдийн цайгаа ууж байна гээд ганц хоёрхон хүн үлдээгээд алга болчихно. Хэд гуравхан теллертэй банкны жижиг салбар бол үдийн цайны цагаар ганц хүн  үлдээгээд бусад нь алга болно. Удаан хүлээсэн хүмүүс асуугаад, шаардлага тавихаар “бид ч бас хүн, цай хоолоо идэх эрхтэй” гэх ухааны юм ярьж өөдөөс загнана. Зарим нь бол манай өөр салбарт очоод үйлчлүүлчих гэж “уриалгахнаар” загнана. Уг нь бол тухайн байгууллагууд ард иргэдэд шуурхай үйлчилж, арай илүү ашиг орлого олох л гэж хотын өнцөг булан бүрт өөр өөрийн салбараа байгуулж, ард иргэд ч  өөрийн ажил, гэр орондоо хамгийн ойр салбараар үйлчлүүлж байхыг боддог. 

Ер нь мэдээжийн ажил, гэр оронд нь ойр банкны салбар, худалдааны төв байхад унаа тэргэнд суугаад өөр нэг газар луу явж байх хэн байх билээ. Тэгээд ч хүн өөр өөрийн ордог дэлгүүр, авдаг бүтээгдхүүн нь орж гардаг худалдааны төв, өөрийн данс даягтай банкны салбараараа л орж байгаа шүү дээ. 

Тэгээд ч ажил албаныхаа чөлөө заваар, ганцхан цаг үргэлжилдэг үдийн цайныхаа цагаар бол хамгийн ойр салбараараа л үйлчлүүлэхийг бодно. Гэтэл ганц хоёрхон хүн үйлчилж байгаа, тэгээд “манай бусад салбараар үйлчлүүлчих” гэхэд гараад л автобус унаанд суугаад өөр салбар луу нь явж байвал хамаг цаг нь барагдаад дуусах биз дээ. 

Эндээс харахад банкны томцуулын салбаруудын  удирдлага, дэлгүүр худалдааны төвийн ээлжийн ахлагчдын томилж суулгаж байгаа өнөө хамаатан садан, нууц амраг гээд дээгүүр харсан, том том ярьж хэдэн ажилчнаа загнадаг тэр хүмүүсийн  орчин үеийн сэтгэлгээ, ажил зохион байгуулах менежмент л үнэхээр цаг үеэсээ үнэхээр хоцрогдоод байгаа нь харагдаад байна. Ухаандаа ид ачааллын үе болох үдийн цайны цаг, ажлын цаг дуусах үеэр касс, үйлчилгээний ажилтнуудаа бүрэн суулгаж хурдан шуурхай үйлчилбэл ард иргэдэд ч тустай, өөрийн байгууллагад нь ч арай илүү ашиг орлого ормоор юм. Тэгээд өдөр, ажлын цагийн дундуур хүмүүсээ ээлж ээлжээр хоолонд оруулдаг байвал үйлчилж байгаа байгууллага, үйлчлүүлэгч гээд аль аль талдаа  амар хялбар, тустай баймаар. 

Ер манай үйлчилгээний аль ч байгууллага, ялангуяа банк, худалдааны том төвүүд, тэгээд жижиг дэлгүүрийн худалдагчдын тухайд ч жаахан мөнгөтэй болоод ирэхээрээ зан нь өөрчлөгдөн, залаа нь сагсайж  “хүнд суртал” руу чирэгдэн “энэ хүмүүс манайхаар үйлчлүүлэхгүй яах юм” гэсэн сэтгэлгээ суучихдаг, юм асуухад гар утсаа барьчхаад нь хариу хэлэх завгүй суудаг нь манайхны зан. 

Дараалалд зогсон удаж удаж очиход банкны теллерүүд бол эрх нь биш ”сайн байна уу, та ямар үйлчилгээ авах вэ” гэх нь ч бий л дээ. Гэхдээ л хэд хэдэн теллер суугаад зэрэг зэрэг хурдан шуурхай үйлчлэхгүй удааж чилээсэндээ  бол огт сэтгэл зовсон шинжгүй байх жишээний. 

Эх сурвалж: Монголын мэдээ сонин @Дугаарын60мөр

2023 оны дөрөвдүгээр сарын 27. Пүрэв. №073 (5801)