Баячуудад ээлтэй Хан-Уулын уулзвар

Нийслэлийн нэлээд ачаалал ихтэй дөрвөн замын уулзварын нэг бол Хан-Уул дүүргийн 120 мянгат хорооллын өмнөх дөрвөн замын уулзвар. Хотын төвөөс Богд уул, Зайсан толгойг тойрсон баячуудын хороолол орох, хаа хол Нисэх Яармагийн иргэд ажил албандаа ирэх, тарах, зүүн тийш Банзүрх дүүргийн орон сууцны хорооллууд руу зорчих гээд аль аль талдаа хөдөлгөөний эрчим ихтэй ийм л уулзвар.

Уг нь бол энэ уулзвар гэрлэн дохиотой, орчин үеийн техник технологиор бүтээсэн энэ гэрлэн дохио тал талаас ирж байгаа хөдөлгөөнийг ээлжлүүлээд, зохицуулан зүг зүгт нь гаргаад байж болмоор. Ингэх ч гэж өдий төдий хөрөнгө зарцуулан ийм төхөөрөг суурилуулсан баймаар.

Гэтэл ажил цуглах, орой тарах гээд хөдөлгөөн ид эрчимжиж түгжрэл эхэлдэг цагаар энд тээврийн цагдаагийн нэг замын зохицуулагч байнга жижүүрлэнэ.

Чухамдаа гар утас, богино долгионы холбоо барьсан тэр зохицуулагчийн хийж гүйцэтгэх үндсэн үүрэг нь хотын төвөөс Богд уул, Зайсан толгой тойрсон тансаг хороололд амьдардаг дарга нар, баячуудын машиныг түгжрэлд зогсоохгүй түргэн нэвтрүүлэх явдал бололтой.

Өглөөдөө урдаасаа хойшоо, оройдоо хойноос хотын төвөөс урагш чиглэсэн хөдөлгөөнийг л саадгүй нэвтрүүлэх үүрэгтэй. Харжээ байхад тэр холбоо РАЦ нь шажигнаад нэг дуугарвал л нөгөө шидэт дохиураа өргөөд л баруун, зүүн урсгалаа хаагаад зөвхөн урагшаа, хойшоо хөдөлгөөнийг явуулж эхэлнэ. Бодоход хэн нэгэн нь “наанаас чинь тэр даргын авгай харих гээд явж байгаа шүү, хөдөлгөөнөө зохицуулаад түгжрүүлэхгүйхэн шиг өнгөрүүл” гэсэн үүрэг өгдөг бололтой. Хойш урагшаа зорчих замаар том том жипүүд харваж өнгөрөөд л, баруун талаас өнөө нийслэлийн түгжрэлийг бууруулах зориулалттай шугамын автобусууд ногоон гэрэл нэг, хоёр, гурван удаа ассан ч зогссоор л байна. Нисэх, Яармаг, ТЭЦ гээд баруун талаас ирдэг автобус нь ч олон. Ийм болохоор энэ замаар зорчигсдын ихэнх нь хол зам туулж ажил албандаа очиж, орой яаран яаран гэр орноо зүглэнэ.

Уг нь бол энэ замаар өнөө өөрсдийгөө тэнгэрийн хаан гээд бодчихсон, хөндлөн урсгалууд бүү хэл, бүх чигэлийн замыг хааж байгаад, элдэв дохио хангинуулаад давхидаг Ерөнхийлөгч, Ерөнхий сайд нар нь явдаггүй.

Гэсэн атлаа баячууд, хурган дарганцаруудын авгай хүүхдэд тал засч зөвхөн тэднийг өглөө ажил албанд нь,  орой гэрт нь түргэн хүргэхийн төлөө шидэт дохиур барьсан нэг хүнийг өглөө оройд тэнд зогсоон, өдий төдий олон хүнийг чирэгдүүлэн ажил албанаас нь хоцроож, оройд гэр орондоо очих цагаас нь хумсалж байх хэрэг Тээврийн цагдаагийнханд байх ёстой гэж үү.

Нөгөө талаас нь харвал тэртэй тэргүй гэрлэн дохио байсаар байтал тэнд нэг хүнийг халуун нар, хүйтэн бороо, цаснаар зогсоон алсын холбоогоор үүрэг өгөн чилээх ямар ч хэрэгтэй юм, яахав цалин авдаг ажил албаа л гүйцэтгэж байгаа юм гэх үү дээ.

Уг нь бол Монгол Улсын Үндсэн хуульд зааснаар бол хүн бүр тэгш эрхтэй баймаар. Хаа тэртээ нисэхэд ажиллаад орой орон гэрээдээ, хэдэн хүүхдээдээ  яаран яаран автобусанд суугаад явж байгаа  хүн, том том жип унасан дарганцрууд, тэдний  авгай нартай ижил тэгш эрхтэй баймаар.

Гэтэл яахаараа нэг хэсэг нь  орон гэртээ харихын тулд цагдаа нараар зохицуулуулан улаан гэрэл дундуур давхиад өнгөрдөг, нөгөө зарим нь болохоор ногоон гэрэл асчихаад байхад л “яагаад явахгүй байгаа юм бол” гээд сууж байх ёстой гэж.

Тээврийн цагдаагийнхан хүнийг алагчлан үзэж дарга нар, тэдний авгай хүүхдэд тал засахаа болиод зүгээр л гэрлэн дохиогоор нь зорчуулчих л даа. Нийслэлд гэрлэн дохиогүй, орой өглөөдөө “ар монголын чагтан түгжээ” үүсдэг уулзвар гарц бишгүй нэг байхад наад зохицуулагчдаа тэнд зогсоовол дээр баймаар.

Эх сурвалж: Монголын мэдээ сонин

2023 оны есдүгээр сарын 20. Лхагва. №148 (5876)