Филиппинд өнгөрөгч зургадугаар сард явагдсан Ерөнхийлөгчийн сонгуульд ялалт байгуулсан Давао хотын захирагч асан Родриго Дутерте албан тушаалаа авснаас хойшхи анхны гадаад айлчлалаа БНХАУ-аас эхлүүлсэн билээ.  Тэрбээр БНХАУ-д дөрөв хоногийн айлчлал хийснийхээ дараа Япон улсыг зорьсон бөгөөд энэ хугацаанд олны анхаарал татсан олон олон мэдэгдлийг хийсээр байна.  Р.Дутерте Филиппиний Ерөнхийлөгчийн албан тушаалыг авсныхаа дараа хар тамхины эсрэг хатуу тэмцэхээ мэдэгдэн, тус гэмт хэргийн эсрэг ширүүн дайн эхлүүлсэн билээ.

 

Хамгийн сүүлд авсан мэдээллээр гэхэд энэ дайны улмаас 3700 хүн нас барсан гэсэн мэдээлэл бий.  Дутертегийн хувьд Давао хотын захирагч байхдаа гэмт хэрэгтнүүдтэй хатуу тэмцэн хэдхэн жилийн дотор гэмт хэргийн гаралтыг бууруулж чадсанаар “шийтгэгч” гэх хочийг авсан байдаг.  Харин Филиппиний Ерөнхийлөгчийн албан тушаалд томилогдсныхоо дараа тэрбээр тус үйл ажиллагаагаа үргэлжлүүлж, улс даяар хар тамхины эсрэг дайныг эхлүүлсэн юм.

 

Гэвч уг дайнтай холбоотойгоор АНУ Р.Дутертег шүүмжлэх болсноор хоёр улсын харилцаа хүйтэрч эхэлсэн.  Филиппиний Ерөнхийлөгч өмнө нь  “Бид АНУ-ын утсан хүүхэлдэй биш”, “АНУ, Филиппиний хамтарсан цэргийн сургуулилт энэ жилээр дуусгавар болно” гэх зэргээр мэдэгдэж байсны зэрэгцээ Ерөнхийлөгч Барак Обамаг “Биеэ үнэлэгчийн хүү”, “Там руугаа тонил” гэх мэтээр  зүй бус үгээр хараан доромжилж байв.  Харин анхны гадаад айлчлалаа БНХАУ-аас эхлүүлсэн нь Филиппиний Ерөнхийлөгчийг АНУ-аас зайгаа барьж, Хятад, ОХУ-ыг түшихийг санаархаж буйг нь илтгэсэн удаатай.

 

Тэгвэл Япон улсад айлчилж буй Дутерте мэдэгдэл хийж, “Филиппинд байрлаж буй АНУ-ын цэргүүдийг хоёр жилийн дотор эх орон руу нь буцаахыг хүсч байна” хэмээгээд “шаардлагатай тохиолдолд АНУ-тай байгуулсан Батлан хамгаалах гэрээгээ цуцална” гэдгээ онцолжээ.

 

Родриго Дутерте БНХАУ-д тал засч, эсрэгээр АНУ-ыг удаа дараа шүүмжилж байгаа бөгөөд зарим хэлсэн үгнээсээ буцсан ч, эцэстээ Филиппиний гадаад бодлого алдагдах хэмжээнд  үзэл бодлоо илэрхийлсээр байна.  Тэрбээр Токиод болсон Эдийн засгийн форумын үеэр тавьсан илтгэлдээ “цаашдаа хоёр жилийн дотор манай улсад гадны цэрэг, арми  байхгүй байхыг хүсч байна” гэж хэлжээ. Түүний үгэндээ онцолсон “гадны цэрэг” гэдэг нь гагцхүү АНУ-ын арми юм.  

 

АНУ-ын арми Филиппиний хэд хэдэн нутагт байрладаг хэдий ч, одоогоор терроризмын эсрэг дайнд дэмжлэг үзүүлэх зорилгоор тус улсын өмнө этгээдийн Минданао аралд тусгайгийн дайчид нь байрлаж буй ажээ. Минданао аралд салан тусгаарлах зорилго бүхий лалын хэт даврагчид хэдэн арван жилийн турш бослого дэгдээж ирсэн байна. Гэсэн хэдий ч, Родриго Дутерте АНУ-ын цэргийг эх орноосоо гаргах бодолтой байгаагаа удаа дараа илэрхийлж байв.