ОХУ-ын Ерөнхийлөгч В.Путины ойрын хүн гэгддэг Ерөнхийлөгчийн тамгын газрын хэвлэл мэдээлэл хариуцсан нарийн бичгийн дарга Дмитрий Песковын эхнэр Холокост /еврейчүүдийг хомроглон устгах/-оос сэдэвлэсэн үзүүлбэр үзүүлээд цахим ертөнцөд  дуулиан тарьжээ.

Песковын эхнэр Өвлийн олимпийн алтан медальт уран гулгагч Татьяна Навка саяхан олны танил алдартнуудын цэнгээнт нэвтрүүлэгт оролцож, жүжигчин Андрей Бурковскитай хослож, нэгэн содон  үзүүлбэр үзүүлсэн гэнэ.  Тодруулбал, тэд  нацист германы үеийн бөөнөөр хорих лагерийн хоригдлуудын өмсдөг хар, цагаан босоо судал бүхий хувцас өмсч, тухайн цаг үеэс сэдэвлэсэн үзүүлбэр үзүүлсэн байна. Ингэхдээ 1998  онд Оскарын наадмын шилдэг гадаад хэл дээрх киногоор тодорсон “Life is Beautiful” киноны хөгжмийг ашиглажээ.

“Life is Beautiful” кинонд еврей залуугийн тухай гардаг бөгөөд бөөнөөр хорих лагерьт хоригдохдоо  хүүгээ айлгахгүйн тулд тухайн цаг үеийн нөхцөл байдлыг тоглоом мэтээр тайлбарлаж, эцэстээ амь үрэгдэж буй тухай өгүүлсэн байдаг билээ. Татьяна Навкагийн оролцсон нэвтрүүлэг Оросын нэгдүгээр сувгаар гарчээ. Улмаар түүний үзүүлбэр шүүгчдээс хамгийн өндөр оноо авч, мөн магтаал хүртсэн байна.

Харин дараа нь Татьяна өөрийн инстаграмм хуудастаа “Миний хамгийн дуртай уран бүтээлийн минь нэг. Бидний үр хойч тэрхүү эмгэнэлт цаг үеийн тухай мэдэх ёстой. Бас хэзээ ч мартах ёсгүй” хэмээн сэтгэгдлээ үлдээсэн байна. Гэсэн ч, түүний үзүүлбэр эдүгээ дэлхийн  нийгмийн сүлжээнд хүчтэй тархаж, хэрүүлийн алим болж эхэлжээ.