БНСУ-ын анхны эмэгтэй Ерөнхийлөгч хэмээн дэлхий дахинаа танигдсан Пак Гын Хе найзыгаа улс төрийн үйл хэрэгтээ хөндлөнгөөс оролцуулсан гэх дуулианд нэр холбогдож,  тус улсын анхны “Гэмт хэргийн сэжигтэн Ерөнхийлөгч” болоод буй билээ.

 

Эцэг, эхээ цаг бусаар алдсан хүнд хэцүү цаг үед нь түшиг тулгуур болж явсан гэх түүний дотны найз Чой Сун Шил Ерөнхийлөгчтэй дотно байдлаа ашиглан өөрийн байгуулсан соёл, спортын чиглэлээр үйл ажиллагаа явуулдаг сандаа томоохон корпорациудаас их хэмжээний мөнгийг хандив нэрийдлээр төвлөрүүлсэн нь ил болж, саатуулагдаад буй. Авлигын хэргийн дуулиан дэгдэж эхэлмэгц  сэжигтний компьютерээс Пак Гын Хе Ерөнхийлөгчийн түүн рүү илгээсэн улс төрийн чанартай нууц материалууд  олдсон байдаг.

 

Ингэснээр Ерөнхийлөгч Чой Сун Шил гэгчийн утсан хүүхэлдэй төдий байж ирсэн нь ийм хэмжээний хөрөнгийн авлига авах нөхцлийг бүрдүүллээ гэх шүүмжлэл ч нийгэмд хүчээ авч эхэлсэн билээ.  Ерөнхийлөгч өөрөө ч хоёр удаа ард түмэндээ хандсан мэдэгдэл хийж, хэлэх үгээ найзаараа засварлуулж байснаа хүлээн толгой гудайлган өршөөл хүссэний зэрэгцээ шаардлагатай тохиолдолд байцаалт өгнө гэдгээ илэрхийлсэн.  

Гэхдээ хуульд зааснаар төрийн эрх барьж буй Ерөнхийлөгч байцаалт өгөх боломжгүй байдаг бөгөөд Пак ч бие төлөөлөгчөөрөө дамжуулан  хэргийн талаар мэдүүлэг өгөхөөс татгалзсан удаатай.  Дуулиан дэгдсэнээс хойш сар орчим хугацаанд БНСУ-ын иргэд ч хэд хэдэн удаагийн томоохон эсэргүүцлийн жагсаалыг зохион байгуулсны зэрэгцээ улс төрийн жижиг хүчнүүд ч үүсээд буй нөхцөл байдлыг ашиглан эрх баригч Сэнүри намын рейтингийг унагахыг оролдож эхэлсэн юм.

 

Сөрөг хүчнийхний зүгээс Пак Гын Хег өөрийн хүслээр албан тушаалаасаа огцрохыг удаа дараа шаардсан. Улмаар өнөөдөр  Үндэсний ассамблейд өнөөгийн Ерөнхийлөгчид итгэл үзүүлэх эсэх талаар санал хураалт явуулах хуулийн төслийг өргөн барихаа мэдэгдсэн билээ. Парламентаар уг асуудлыг энэ баасан гарагт хэлэлцэх юм. Тэгвэл ард иргэдийнхээ ширүүн эсэргүүцэлтэй нүүр тулгараад буй Ерөнхийлөгч Пак Гын Хе асуудлыг шийдвэрлэх гарцыг парламентад үлдээхийг хүсчээ.  Тодруулбал, тэрбээр энэ баасан гарагт болох парламентын хуралдааны үеэр гишүүд түүнийг суудлаас нь буулгахыг хүсвэл огцроход бэлэн байгаагаа мэдэгдсэн байна. 

 

Пак “Үндэсний ассамблей миний Ерөнхийлөгчийн албыг хаших хугацааг богиносгох, эсвэл огцруулах ямар ч шийдвэр гаргасан бай, би тэдний шийдвэрийг дагах болно. Хэрэв үндэсний ассамблей улс төрийн эмх замбараагүй байдал, хий хоосон улстөржилтийг шийдвэрлэхийн тулд  эрх мэдлийг тогтвортойгоор шилжүүлнэ гэвэл  би Ерөнхийлөгчийн албан тушаалаасаа огцроход бэлэн байна” гэжээ.  

 

Хэдэн долоо хоногийн турш нийслэл Сөүл хотноо сая сая солонгосчууд Ерөнхийлөгчөө огцрохыг шаардан жагссаны дараа үндэсний телевизээр хийсэн мэдэгдэлдээ тэрбээр ийнхүү ярьсан байна. Ирэх жил Ерөнхийлөгчийн халаагаа өгөх Ерөнхийлөгч Пак Гын Хэ, түүний найз Чой Сүн Шил нарын хэрэгт Солонгосын нэр нөлөө бүхий компаниуд болох Lotte, Samsung гэх мэт долоон компани холбогдоод буй бөгөөд Пак Гын Хэгийн хоёр туслахыг мөн баривчлан, байцааж эхлээд буй юм.