Ази хүмүүсийн европчуудаас ялгагдах гол онцлог нь онигор нүд, өргөн шанаа байдаг гэдэг. Тэгвэл угийн гэж хэлж болохуйц онигор нүд эдүгээ том асуудал тарьж эхлээд буй гэнэ. Тодруулбал, саяхан Ази гаралтай Шинэ Зеланд хүн  улсынхаа бүртгэлийн байгууллагад очиж, паспортоо солиулахаар болж л дээ.

Гэтэл түүний өгсөн зурагт нүд нь нээллтэй байсаар байтал аниатай байна хэмээн нүүр царай таних программ тодорхойлж, тун сонин байдал үүссэн байна. Онигор нүд нь асуудал болоод буй Ази гаралтай залууг Ричард Ли гэдэг аж. Тэрбээр Тайваньд төрж, Шинэ Зеландад өсчээ. Харин эдүгээ Австралийн Мельбурн хотод суралцаж буй бөгөөд зул сараар нутаг буцахын өмнө паспортоо шинэчлэхээр болжээ. 

Гэвч Шинэ Зеландын Дотоод хэргийн яамны ашиглаж буй нүүр царай таних программ Лигийн цээж зураг дээр “Нүд нь аниастай байна” гэж тодорхойлсноор ийм явдал үүссэн байна. Ли өөрөө энэ явдлын талаар олонд дэлгээгүй ч, найз нар нь фэйсбүүк хуудастаа “Засгийн газар арьс өнгөөр ялгаварладаг төхөөрөмж ашигладаг юм биш үү” гэх зэргээр дургүйцлээ илэрхийлжээ. Харин Дотоод хэргийн яамны төлөөлөгч мөн яамны систем ямар нэг байдлаар ялгаварласан зүйл байхгүйг онцлоод зөвхөн энэ удаа л ийм асуудал гарч буйг учирлажээ.