Испанийн цагдаагийн байгууллага олон улсын роуминг ярианы сүлжээ ашиглан зохион байгууллалттай залилангийн хэргээр БНХАУ-аас гаралтай 200 гаруй хүнийг баривчилжээ. Хэргийн сэжигтнүүд сүлжээгээр БНХАУ-д амьдарч буй энгийн иргэдээс нийтдээ 16 сая гаруй еврог залилсан нь тогтоогдсон байна. Испанийн цагдаагийн газрын дарга Элой Кюрос хэвлэлийнбага хурал зарлан энэ талаар мэдээлсэн ажээ. Хохирогчдын хувьд хэдэн саяар тоологдож буй бөгөөд бүгд БНХАУ-ын иргэд байсан гэнэ.

Мөн ихэнх нь ядуу амьдралтай өрхүүд байжээ.  Залилуулсан тэдгээр иргэд бүх хөрөнгөө хэргийн улмаас алдаж, бүх амиа хорлосон тохиолдол ч мөн гарсан байна. Харин гэмт хэргийн бүлэглэлийн тухайд ойр дотныхон, найз нөхөд, гэр бүл нь амьдардаг БНХАУ руу дуудлага хийж, залилангийн хэргээс анхааруулдаг аж. Түүнийхээ дараа залилангийн хэргийг мөрдөн шалгаж буй цагдаагийн дүр эсгэн  хохирогч иргэд рүү дуудлага хийж, мөрдөн шалгах ажиллагаанд хамтран ажиллах нэрээр данс руугаа мөнгө шилжүүлүүлдэг байжээ.

Томоохон сүлжээ бүхий хэдэн сая хохирогчтой хэргийн үйлдэгчдийг баривчлахын тулд Испанийн цагдаагийнхан БНХАУ-ын холбогдох албаныхантай хамтран ажиллаж, Мадрид, Барселона, Аликанте гэх мэт хотууд дахь тансаг зэрэглэлийн хотхонд харш түрээслэн амьдарч байсан залилангийн бүлгийн 13 цэгийг илрүүлсэн байна. Испанид Хятадууд олноороо цагаачлан амьдардаг аж.  2015 оны хүн амын тооллогоор 170 мянган хятад иргэн амьдарч байна гэсэн дүн гарсан байна.