Улаанбаатар хотын агаарын бохирдол дээд цэгтээ хүрээд, гамшгийн хэмжээнд тулчихаад хэчнээн ч жилийг үдэв бүү мэд. Сүүлдээ иргэд агаарын бохирдлыг тэсч давахаа больж, нийслэлийн бүх л бага насны хүүхэд эмнэлгийг дүүргэчихээд байна. Хатуухан хэлэхэд, цэцэрлэгтээ явж байгаа бага насны хүүхэд бараг л алга байна шүү дээ. Өнгөрсөн хугацаанд төр засгаас утаатай тэмцээгүй биш тэмцсэн. Гэхдээ яг утаатай тэмцсэн үү, харин тэмцэж байгаа нэрийдлээр хэдэн компанийн бизнесийг дэмжсэн үү гэдэг нь ярих л асуудал.

Утаанаас салахын тулд орон сууцжуулах шаардлагатай. Түүнээс өмнө яаралтай арга хэмжээ авч, утааны хорыг ч болов багасгах хэрэгтэй. Ингэхийн тулд утаагүй зуух, утаагүй түлш тараахаас өөр аргагүй хэмээн иргэдийн тархийг угаасан. Саяхныг болтол жилдээ 30 тэрбум төгрөгийг утаагүй зуух үйлдвэрлэх, түлш хийх энэ тэрд үрэн таран хийж байсан шүү дээ.

Үе үеийн Засгийн газар ажилласан нь үнэн. Гэхдээ үр дүнд огт хүрээгүй байна. Харин ч утаа улам ихэссээр. Угаасаа гэр хороолол улам тэлж, автомашины тоо өдрөөс өдөрт нэмэгдэж байхад яаж утаанаас салах вэ дээ. Харин өнгөрсөн долоо хоногт Ерөнхий сайд гэнэт ухаан орж, гэр хорооллын иргэдийн цахилгааны шөнийн тарифыг тэглэхээр боллоо. Тэрбээр “Утаа багатай зуух, утаа багатай түлш л үйлдвэрлэж байж. Зуух ч утаа гаргана, түлш ч утаа гаргана. Тийм учраас агаарын бохирдол буурахгүй байна.

Ганц түлш, зуухтай ноцолдоод ямар ч үр дүн үзүүлэхгүй байна. Тиймээс өнөөдөр Улаанбаатарын утаа ийм хэмжээнд хүрч, нийгэмд бухимдал үүсээд байна” хэмээн хэлсэн. Өнөөдрийг болтол нэг ч Ерөнхий сайдын ойлгоогүй байсан зүйлийг энэ хүн ойлгосонд баярлаад барахгүй байна. 2017 онд агаарын бохирдлыг бууруулахад зориулж дөрвөн тэрбум төгрөг төсөвлөсөн. Энэ мөнгөний 80 хувийг шөнийн тарифыг тэглэхэд зарцуулах юм байна. Одоо л зөв ажиллаж эхэллээ. Аль эрт л ингэх байсан юм. Бүр жилдээ 30 тэрбумыг хайр найргүй үрж байхдаа л энэ аргыг хэрэглэх байлаа.

Тэгээд шөнийн тарифыг хөнгөлсөн алдагдлыг нь цахилгаан станцуудад өгөөд, илүү гарсан мөнгөөр нь шалны халаалтаас авахуулаад цахилгаанаар халааж болох бүх л технологийг нэвтрүүлэх байсан юм. Тэр бүгдийг хөнгөлөлттэй үнээр өгөхөд төсвөө зарцуулсан бол бид өдийд утаанаас салчихдаггүй юм гэхэд хөнгөлчихсөн байх байлаа.

Гэхдээ оройтсон ч гэсэн ийм шийдвэр гаргасан нь их юм даа. Хэдийгээр манай улсын цахилгаан эрчим хүчний чадал тийм ч сайн биш ч гэсэн гэр хорооллын 200 мянган айлын ядаж 10 хувь нь яндангаасаа салчихвал сайн хэрэг биз дээ. Нэг үеэ бодвол 3, 4 дүгээр цахилгаан станцууд өргөтгөл хийчихсэн.

Цахилгаан эрчим хүчний чадал арай дээрдээд л байгаа. Цаашлаад Ерөнхий сайд эрдэмтэдтэй хамтарч ажиллахаар болоод, цахилгаан эрчим хүчний хэмнэлттэй халаалтын системийг шийдэхээр болсон байсан. Цахилгаан бага хэрэглэдэг, дээрээс нь гэр, байшинг хангалттай халаагаад байдаг халаалтын систем гаргаад ирвэл бүр ч болоод явчихлаа. Одоо ч гэсэн халаалтын түмэн янзын технологи гарчихсан байна.

Гагцхүү цахилгааны үнийг нь дийлэхгүй гээд л иргэд хэрэглэхгүй байгаа болохоос биш. Одоо бол шөнийн тарифыг хөнгөлчихлөө. Иргэдэд ч боломж гараад ирлээ. Цаашлаад утаа бууруулахад зориулах олон тэрбумаа цахилгаан халаалтын төхөөрөмжүүдийг хөнгөлөлттэй үнээр авахад зарцуулбал сайнсан. Энэ Засгийн газар утааны эсрэг зөв ажил эхлүүллээ. Цаашлаад энэ замаасаа гарчихалгүй явах байлгүй дээ.