Мьянмарын хамгийн том хот болох Янгоны нисэх онгоцны буудалд ардчиллын төлөө тэмцэгч Ан Сан Су Чигийн тэргүүлэх эрх баригч “Ардчилсан холбоо” намын хуулийн зөвлөх нарын хоёр томоохон албан тушаалтан үл таних этгээдэд буудуулж, амиа алджээ. Улмаар нисэх буудлын аюулгүй албаныхан шуурхай ажилласны дүнд гэмт этгээдийг хэргийн газарт баривчилж, ямар учраас хүний аминд хүрэх болсныг нь шалгах ажиллагааг эхлүүлсэн байна. Хэрэг Янгоны нисэх онгоцны буудлын олон улсын терминалын таксины зогсоолын ойролцоо гарчээ. Цагдаагийн газраас мэдээлж буйгаар хэргийн улмаас хоёр хүн нас барсны нэг нь Ан Сан Су Чигийн намын хуулийн зөвлөх Ко Ни байсан бол нөгөө нь таксины жолооч байжээ. Хэргийг 50 гаруй насны эрэгтэй хүн үйлдсэн байна.

Ко Ни Су Чид олон жилийн турш хуулийн туслалцаа үзүүлж ирснээс гадна Ардчилсан хөдөлгөөн намд байдаг хэдхэн мусальман шашинт  албан тушаалтны нэг гэдгээрээ танигддаг байв. Одоогоор албаныхан хэргийг зохион байгуулалттай гэмт хэрэг гэж үзэж байгаа аж. Гэхдээ ямар шалтгаанаар хөнөөсөн нь тодорхойгүй байна. Хэрэг гарах үед Ко Ни ач хүүгээ тэвэрсэн байжээ. Энэ талаар түүний охин Ен Нве Хин “Аав минь ачтайгаа яриад явж байсан юм. Гэтэл гэнэт л буун дуу сонсогдсон. Эхэндээ би машины дугуй хагарч байгаа юм болов уу гэж бодсон. Гэтэл аав газарт унасан байсан” гэж ярьжээ.

Түүнчлэн Ко Ни амьд сэрүүн байхдаа Мьянмарт цэргийнхний хүч нөлөө хадгалагдсаар байгааг удаа дараа эрс шийдэмгийгээр шүүмжилж ирсэн нь олон дайсантай болгож байсан гэнэ. Охин нь ярихдаа “Эцэг минь байнга л  сүрдүүлэгт өртдөг байсан. Бид нар тухай бүрт болгоомжтой байхыг сануулдаг байсан ч, аав амаа хамхихыг хүлээн зөвшөөрдөггүй. Тэр үргэлж зөв гэж бодсон зүйлээ л хийдэг байлаа. Бид өөр шашны итгэл үнэмшилтэй учраас олон хүн биднийг үзэн яддаг.

Яагаад түүнд ийм зүйл тохиолдсон шалтгааны би үнэндээ хэлж мэдэхгүй байна” гэж өгүүлжээ. Харин таксины жолооч буутай этгээдийг зогсоохыг оролдож байхдаа амиа алдсан байна. Энэ талаар Ерөнхийлөгчийн хэвлэлийн төлөөлөгч Зау Хтай “Бид хэрэгтнийг саатуулсан. Улмаар хүний амь бүрэлгэх болсон шалтгаан, түүний ард хэн байгаа, түүнд хэдийг төлсөн гэх мэт асуудлыг тодруулж байна” хэмээн хэвлэлд өгсөн ярилц­лага­даа дурьдсан байна. Мьянмарын  баруун этгээдийн Ракхайн мужид цөөнхийн лалын шашин­тан болон олонхийн буддын шашинтнууд хоорондын сөргөлдөөн үргэл­жилж буй бөгөөд цагдаагийнхан ч, энэ удаагийн хэрэг шашны зорилготой байж магадгүй хэмээн таамаглаж байгаа юм байна.