Монгол Улсын эдийн засаг хямарч, сэхээнд байгаа хүнтэй адилхан болчихоод байгаа. Ерөнхий нөхцөл байдал тун хүнд байна. Сэхээ орох уу эсвэл гэсэн сонголтын өмнө ирчихсэн байгаа гэдгийг эдийн засагчид, байдлыг илүүтэй мэдэж байгаа хүмүүс ярьсаар л. Одоо манай эдийн засаг жаахан сэргэж, амь тариатай золгох эсэх нь ОУВС-гийн шийдвэрээс хамаарчихаад байна. Ер нь бол ОУВС-гийн төлөөлөгчид манайд ирж, нөхцөл байдлыг судалсан, харсан, үзсэн. Бүх тоо баримтыг үзэж, тооцоолол хийсэн. Манайхан ч аль байдгаараа л сайхан хандсан байх. Одоо ганцхан шийдвэр л хүлээж байгаа.

Уг нь ОУВС-гийн зээл цагаан сараас өмнө бүтэх магадлал байна, бараг л бүтчихлээ гэсэн мэдээлэл яваад байсан. Гэвч одоохондоо яг бүтэж байгаа эсэх талаар тодорхой мэдээлэл гараагүй л байна. Зарим эх сурвалжийн хэлснээр бол ОУВС зээлээ өгөх магадлал байгаа ч  Хөгжлийн банкны 580 ам.долларын зээлийг дарахыг хүлээж байгаа аж. Яагаад гэвэл, ОУВС манайд өгөх зээлийг өрөндөө өгчихөж магадгүй гэж болгоомжлоод байгаа сурагтай. Ингээд л ирэх гуравдугаар сарын 21-нээс хойш энэ асуудал яригдахгүй дээрээ тулчихсан бололтой юм. Ер нь ОУВС-гийнхны болгоомжол зөв л дөө. Манай Засгийн газар 580 сая ам.долларын өрийг яаж дарах эсэх нь одоогоор тодорхой биш байна. Гэтэл бидэнд ердөө л сар гаруйн хугацаа л байгаа. Ерөнхий сайд бол “Ард түмнээсээ хандив авахдаа тулаагүй. Бид өрөө төлж чадна” гээд хэлчихсэн.

Харин хаанаас, ямар мөнгө олж энэ их мөнгийг төлөх гэж байгаа нь сонин байна. Яахав, нэг гарц байгаа болохоор, эсвэл яриа хэлэлцээр хийгээд, амжилт олсон учраас болно гэж хэлсэн байх. Ямар ч байсан энэ мөнгийг бид дарна. Түүний дараа харин яах вэ. Эдийн засагт нар тусах янз алга. Одоохондоо манайх руу орж ирэх хөрөнгө оруулалтын сураг байхгүй байна. Валютын орох урсгал өсөхгүй байгаа. Бид байгаа хэдэн ам.доллараа гадагш нь гаргаж үрэх нь л их байна. Ганц, хоёрхон гэгээтэй мэдээ байгаа нь дэлхийн зах зээл дээр нүүрс, зэсний үнэ жаахан өсөх хандлагатай байгаа. Тавантолгойн нүүрсээ арай ахиу үнээр зарж эхэллээ. Ирэх дөрөвдүгээр сарын 1 гэхэд Чалькогийн өр дуусна гээд байгаа. Түүнээс хойш нүүрсээ арай өндөр үнээр зарж, мөнгө нь улсад орж ирэх юм.

Үүнээс өөрөөр бол эдийн засаг сэргэх янз алга. Хэрвээ манайх ОУВС-гийн зээлээ аваад, зөв зарцуулж чадвал байдал арай дээрдэж магадгүй. Ер нь бол “Стэнд бай” хөтөлбөрт хамрагдчихвал энд тэндээс авах зээл нийлээд 1-1.5 тэрбум ам.долларын асуудал яригдаад байгаа юм. Тиймээс ийм хэмжээний мөнгө орж ирвэл ядаж  л ам.долларын ханш буурна. Ам.долларын ханш нэлээд буурчихвал шатахууны үнээс авахуулад гаднаас оруулж ирж байгаа бараа бүтээгдэхүүний үнэ буурах боломж байгаа. Харин бүтэхгүй бол тэгээд л өнгөрөх гээд байна. Юун ам.долларын ханш тогтвортой байх, хэцүүхэн л юм болно доо. Тэртээ тэргүй манай улс валютын нөөц гээд байх юмгүй болчихсон. Монголбанкнаас интервенц хийх ч боломж хомс байгаа.

Гэх мэтээр хүндрэл их байна. Монгол Улсын эдийн засаг сэхээнээс өндийх үү, эсвэл үгүй юу гэдэг тэгэхээр ОУВС-гийн гарт байна. Тэдэнд л биднийг эмчлэх эм байна гэсэн үг. Яахав, нөхцөл байдал гэнэт дээрдээд, асуудал өөр тийш эргэж, шидийн юм болчихож магадгүй л юм. Маш өөдрөгөөр бодоход. Түүнээс өөрөөр бол ОУВС-гийнхан жаахан найр тавьж, маныгаа бодоосой гээд л залбирч суухаас өөр яалтай.