Германы канцлер Ангела Меркель өнгөрсөн долоо хоногийн баасан гарагт АНУ-д хийх айлчлалаа эхлүүлж, нийслэл Вашингтон ДС хотод байрлах Цагаан ордонд Ерөнхийлөгч Доналд Трамптай анх удаа уулзалт хийжээ.  Үл хөдлөх хөрөнгийн бизнесмэн тус улсын Ерөнхийлөгч болсноос хойш А.Меркель тус улсад анх удаагаа айлчилж буй нь энэ. Гэсэн ч тэдний уулзалтын уур амьсгал тун хүйтэн хөндий болж өнгөрсний зэрэгцээ гадаад худалдаанаас эхлээд дүрвэгсдийн асуудалд харилцан адилгүй байр суурийг илэрхийлж, нэгдсэн ойлголцолд хүрч чадалгүй өндөрлөсөн байна. 

 

Умард Атлантын цэргийн эвсэл, батлан хамгаалах төсөв, чөлөөт худалдааны гэрээний асуудлаар мөн хоёр орны төрийн тэргүүн хамтарсан хэвлэлийн хурал зарласан ч, мөн л таагүй уур амьсгал дунд үргэлжилжээ. Ерөнхийдөө тэднээс нийтлэг зүйлс бараг ажиглагдахгүй байсан талаар “AFP” агентлаг мэдээлсэн байна. 

 

Цагаан ордны “East room”д болсон 30 орчим минутын уулзалтын үеэр Доналд Трамп УАЦЭ батлан хамгаалахын төсвөө оновчтой зүйлд зарцуулахгүй байгааг шүүмжилж, шударга, харилцан ашигтай гэрээ, хэлцэл хийх бодолтой байгаагаа илэрхийлж байсан бол А.Меркель одоогийн байр суурьтаа хатуу зогсч байжээ. 

 

Физикч мэргэжилтэй Меркель олон жилийн турш өмнөх Ерөнхийлөгч Барак Обамагийн хамгийн ойрын улс төрийн түнш байсан юм. Тэрч утгаар харилцан итгэлцдэг, хэлэлцээрийн тухайд ч нийтлэг тал ихтэй байжээ. Гэвч, Доналд Трамп энэ оны нэгдүгээр сард Ерөнхийлөгчийн тангаргаа өргөснөөс хойш түүний дүрвэгсдийг хүлээн авах улс төрийн бодлогыг “алдаа” хэмээн үзэж буй. 

 

Ангела Меркель, Доналд Трамптай хамтарсан хэвлэлийн хурал хийх үеэр “Нүүр тулж ярилцах үед ихэвчлэн нэг нэгнийхээ тухай ярилцах нь бий. Бидний уулзалт үүнийг илэрхийллээ” хэмээсэн ч, уулзалтын үеэр хоёр төрийн тэргүүний хооронд хурцадмал өнгө аяс ажиглагдсаар байв. 

 

Доналд Трамп өөрийнх нь утасны яриаг Обамагийн засаг захиргаа чагнаж байсан тухай хэлээд “ядаж л бид нэг юмаараа ижил юм” гэж хошигносон бол А.Меркель үл ойшоох хандлага гаргаж байжээ. 

 

Обамагийн үед АНУ-ын тагнуулынхан Меркелийн утасны яриаг чагнасан гэх мэдээлэл дуулиан тарьж байсан юм. Өөрөөр хэлбэл Америк, Германы удирдагч нарт санал нийлэх зүйл бага байсан нь эндээс харагдаж байна.  Хурлын үеэр Меркель Европын холбоо гишүүн орнууддаа дүрвэгчдийг нутагшуулахад нь хэрхэн дэмжин тусалж байгааг ярьсан бол Трамп Америкт ажлын байрыг хэрхэн гадаад орнуудаас буцаан авчрах тухай голлон ярьжээ. Меркель үг хэлэх үеэрээ Трамп руу үе үе хандаж, инээмсэглэн найр тавьж байсан ч Трамп түүн рүү харалгүй, эгц урагшаа харсаар хурлыг дуусгасан байна.