Одоогоос 92 жилийн өмнө Монгол анхдугаар Үндсэн хуулиа баталж, Бүгд Найрамдах Улс болсноо тунхаглан зарласан түүхтэй.

Тэгвэл тэрхүү  түүхт өдрийн 92 жилийн ой өнөөдөр тохиож буй. Энэхүү өдрийг тохиолдуулан  НИТХ-ын төлөөлөгч Х.Хатанбаатарыг Нийслэлийн дээд шагнал “Хангарьд” одонгоор шагналаа. Тэрбээр, энэ сард АНУ-ын Лас Вегас хотод болсон олон улсын оюун ухааны 40 дэх удаагийн олимпод эх орноо төлөөлөн баг тамирчидтайгаа оролцож, 15 медаль хүртэн, багаараа тэргүүн байр эзэлсэн юм.

Энэ үеэр  Х.Хатанбаатар “Оюуны спортод оруулсан хувь нэмрийг минь үнэлж энэ хүндтэй шагналаар шагналаа гэж ойлгож байна. Энэ бол ганц миний хөдөлмөр биш, маш олон хүний чин сэтгэл, хичээл зүтгэлийн үр дүн юм. Ялангуяа тамирчдын маань амжилтын үндэс суурь болсон байгууллагын хамт олондоо, амжилтын эзэд тамирчиддаа, гэр бүлийнхэнд нь болон бидэнд үргэлж урам өгч байдаг монголчууддаа баярласнаа илэрхийлье” гэв.

Мөн тэрбээр, цаашид оюуны спортын тодорхой төрлүүдийг эх орондоо хөгжүүлэхийн төлөө хичээн ажиллана гэдгийг онцолсон юм.