БНХАУ-ын дарга Си Зиньпин АНУ-д айлчиллаа. Өнгөрөгч онд АНУ-ын Ерөнхийлөгчийн сонгууль болсноос хойш анх удаагаа хоёр орны төрийн тэргүүн нүүр тулан уулзсан  нь энэ. Айлчлалаас өмнө БНХАУ-ын төрийн хэвлэлд энэ удаагийн айлчлалаар Си Зиньпин АНУ-ын Ерөнхийлөгчтэй зөвхөн улс төрийн асуудлаар хэлэлцээр хийгээд зогсохгүй, хувь хүн талаасаа  итгэлцэл бий болгоход анхаарах тухай дамжуулж байсан юм.

Си даргын айлчлал пүрэв гарагт эхэлсэн. Д.Трамптай  Флорида мужийн  Уэст Палм Бич дахь хувийн эзэмшлийн Мар А Лагод оройн зоог барьж, үүний дараа олон  төвөгтэй асуудлын талаар ярилцжээ.

Ерөнхийлөгчийн тангараг өргөснөөсөө хойш дэлхийн хэд хэдэн орны төрийн тэргүүнийг элдэвлэсэн Доналд Трамп БНХАУ-ын даргатай хэрхэн харьцах нь ч анхаарал татаж байлаа.

Өмнө нь тэрбээр Японы Ерөнхий сайд Шинзо Абэтай уулзахдаа 19 секунд тасралтгүй гар барьж олныг гайхшруулсан бол  дараа нь Германы канцлер Ангела Меркельтэй гар барихаас татгалзаж, нөлөө бүхий удирдагч эмэгтэйг эвгүй байдалд оруулж байв.

Сонгуулийн кампанит ажлынхаа үеэр болон Ерөнхийлөгчийн тангараг өргөснөөсөө хойш ч тэрбээр  БНХАУ-ын “нэг Хятад” бодлогыг сөрж, Тайванийн тэргүүнтэй утсаар ярьж, Хятадыг валютын ханшийн зөрүүнээс ашиг ологчид хэмээн цоллож, худалдааны тэнцвэргүй байдлыг арилгахын тулд бараа бүтээгдэхүүнд 45 хүртэлх хувийн гаалийн татвар ногдуулна гэж мэдэгдэж байсан удаатай. Үүнээс үүдэн хоёр улсын  харилцаанд сэв сууж  эхэлсэн байдаг.

Тиймээс ч, АНУ-ын  интертайнер Ерөнхийлөгч БНХАУ-ын дарга Си Зиньпинтэй уулзалт хийхдээ ямар авир гаргах нь анхаарал татаж байсан хэрэг. Тэгвэл  энэ удаагийн уулзалт тун найрсаг, зочноо хүндэтгэсэн уур амьсгал дунд болж өнгөрчээ.  Тэдний ярилцсан гол сэдэв нь БНАСАУ-ын цөмийн хөтөлбөр болон хоёр улсын худалдаа байсан гэнэ. Уулзалтын төгсгөлд Си Д.Трампыг БНХАУ-д айлчлахыг урьсан байна. Гэхдээ өдрийг нь хараахан товлоогүй аж. Айлчлал өндөрлөж, манай өмнөд хөршийн тэргүүн Флоридаг орхисны дараа АНУ-ын Төрийн нарийн бичгийн дарга Рекс Тиллерсон айлчлалын талаар товч мэдээлэл хийсэн. Энэ үеэр “Хоёр улсын төрийн тэргүүний уулзалт цаашдын олон төвшний харилцааны  суурийг тавьсан“ гэдгийг онцолжээ. Мөн БНАСАУ-ын цөмийн хөтөлбөр ноцтой төвшинд хүрснийг аль аль нь хүрээн зөвшөөрсөн ч, бодитой асуудалд тохиролцоонд хүрээгүй байна. Гэхдээ Си дарга АНУ-тай ижил байр суурьтай байгаагаа илэрхийлжээ. Түүнчлэн, “АНУ-БНХАУ”-ын худалдааг сайжруулах 100 хоногийн ажлын төлөвлөгөө боловсруулахаар тохиролцсон байна.

Д.Трампын зээ мандарин хэлээ шалгуулжээ

АНУ, БНХАУ-ын төрийн тэргүүнүүдийн дээд хэмжээний уулзалтын нэгэн онцгой үйл ажиллагаа нь Д.Трампын зээ хүүхдүүдийн урлагийн үзүүлбэр байжээ. АНУ-ын төрийн тэргүүний  зээ таван настай Арабелла Кушнер, гурван настай Жозеф Кушнер нар БНХАУ-ын дарга Си Зиньпин, түүний гэргий Пен Лиюань нарт зориулан Хятадын ардын дуу дуулж, эртний сонгодог шүлгийн хэсгээс уншиж сонирхуулжээ. Тэдний бичлэгийг Иванка өөрийн сошиал хуудастаа нийтэлж, “АНУ-д албан ёсны айлчлал хийж байгаа ерөнхийлөгч Си Зиньпин, хатагтай Пэн Лиюань нарыг хүндэтгэн тоглолтоо үзүүлсэн Арабелла, Жозеф нараараа бахархаж байна” гэх тайлбар зүүсэн байв. Хүүхдүүд хамтран  “Мо Ли Хуа” буюу “Жасмин цэцэг” хэмээх дууг дуулсны дараа Арабелла охин Тан улсын үеийн яруу найрагч Ли Байн хоёр шүлгийг уншиж өгчээ. Тэдний дуулсан дууг Си Зиньпиний эхнэр Пэн Лиюань 2005 онд болсон гала тоглолтын үеэр дуулж байсан гэнэ.