Улаанбаатар төмөр замын Аялал жуулчлалын товчоо, БНХАУ-ын Хөх хотын Төмөр замын олон улсын аялал жуулчлал, зар сурталчилгааны групп хоорондын жуулчин солилцох хамтын ажиллагааны нээлтийн ёслол  Дорноговь аймгийн Замын-Үүд суманд болж, анхны өдрийн жуулчнаа хүлээн авлаа. Ёслолын үйл ажиллагаанд Дорноговь аймгийн ИТХ-ын дарга С.Түмэнбаяр, ГХЯ-ны Хөрш орнуудын газрын гуравдугаар нарийн бичгийн дарга О.Цэрэндондог, УБТЗ-ын Дотоод аудит, хяналтын албаны дарга Ж.Пунцаг, Аялал жуулчлалын товчооны захирал Б.Хажидмаа, Замын-Үүд сумын Засаг дарга Н.Алдарбаяр  нарын албаны хүмүүсээс гадна Эрээн хотын консул Л.Золзаяа, Эрээн хотын дэд консул Д.Болд, Хөх хотын ачаа тээвэр хариуцсан дэд дарга Чуан Шао Цун, Хөх хот аялал жуулчлал зар сурталчилгаа хариуцсан дарга Чао Чөн нарын хүндтэй зочид төлөөлөгчдөөс гадна БНХАУ-ын  70 гаруй жуулчид, хэвлэл мэдээллийн ажилтнууд оролцсон юм.  

Энэ үеэр Дорноговь аймгийн ИТХ-ын дарга С.Түмэнбаяр “Аялал жуулчлалыг утаагүй үйлдвэрлэл гэж хэлдэг.  Эрээнд өнгөрсөн жил  болсон гурван улсын форумын үеэр зөвхөн Эрээний хилийг үзэх гэж нэг сая орчим жуулчин очдог тухай сонсч байсан. Тэр үеэс Эрээнд ирсэн жуулчдыг Сайншанд, Замын-Үүд, Хамрын хийд зэрэг газрууд руу аялуулах боломжтой талаар шат шатны байгууллагуудад тавьж ирсэн. Харин өнөөдөр Улаанбаатар төмөр замын аялал жуулчлалын товчоо эхлэлийг нь  тавьсанд таатай байна.  Цаашдаа ажил хэрэг болоод явбал  Эрээнд ирж буй сая жуулчны цөөн хэдийг нь ч гэсэн эх орон руугаа татах боломжтой болох юм. Гэхдээ юун түрүүнд жуулчдын аюулгүй байдал, үйлчилгээний нөхцлийг нь сайжруулах хэрэгтэй.

Дорноговь хамгийн урт төмөр замтай аймаг. Энэ дагуу аялал жуулчлал хөгжвөл бидэнд ч, бүс нутагт ч ашиг орлого нэмэгдэхэд нь ач холбогдолтой гэж харж байна” хэмээн онцоллоо. Улаанбаатар төмөр замын аялал жуулчлалын товчоо Хөх хотын Төмөр замын олон улсын аялал жуулчлал, зар сурталчилгааны группын энэхүү хамтын  ажиллагааны  хүрээнд манай улс ирэх арваннэгдүгээр сарын 1 хүртэл  багадаа 4800 өдрийн жуулчин хүлээн авах боломжтой болж байгаа ажээ.

Улаанбаатар төмөр замын аялал жуулчлалын товчооны захирал Б.Хажидмаа “Хөх хотын аялал жуулчлал, зар сурталчилгааны групп, Улаанбаатар төмөр замын товчоо удаан хугацааны турш  харилцаатай байсаар ирсэн. Гэхдээ өмнө нь манайх өдрийн жуулчин хүлээн авч байгаагүй. Энэ удаа эхлэлийг нь тавьж байна. Хөх хотын аялал жуулчлал, зар сурталчилгааны группын зүгээс  адилхан төмөр замын байгууллага төдийгүй, төрийн оролцоотой аялал жуулчлалын үйлчилгээ явуулах байгууллага гэдэгт сэтгэл ханамжтай байгаагаа илэрхийлсэн.

Бидний төлөвлөгөөнд өнөөдрөөс эхлээд ирэх арваннэгдүгээр сарын 1 хүртэл долоо хоногийн даваа, баасан гараг тус бүрт 100 жуулчин хүлээн авахаар тусгагдсан байгаа. Үүгээр тооцвол багадаа 4800 жуулчин авна. Түүнчлэн, Дорноговь аймгийн Засаг даргын тамгын газар, Эрээн хотын аялал жуулчлалын танхимын хооронд гэрээ байгуулж, 30 мянган жуулчин хүлээн авахаар тохирсон байдаг.  Бидний хувьд  тэдгээр жуулчдыг  дээр дурьдсан долоо хоногийн хоёр өдрөөс бусад өдрүүдэд ч Замын –Үүд дэх салбар, үйлчилгээний зочид буудал, ресторан, жуулчны бааз, “Монголд үйлдвэрлэв” дэлгүүрийн  хүчин чадлаасаа хамааран хүлээн авах боломжтой. Үүнийг ч, Дорноговь аймгийн ЗДТГ-аас дэмжиж байгаа” гэлээ.

Өдрийн жуулчин солилцох хамтын ажиллагааны хүрээнд Замын-Үүдэд хүрэлцэн ирсэн анхны 70 гаруй жуулчин тус сумын соёлын төвд болсон нээлтийн ёслолд оролцсоныхоо дараа урлагийн тоглолт үзэж, Монголын соёл уламжлалтай танилцлаа. Харин үүний дараа “Жинчин” зочид буудлын ресторанд зочилж, монгол үндэсний хоол амталж,  төмөр замын дэргэдэх “Ган зам” дэлгүүрээс бараа бүтээгдэхүүн худалдан авлаа.

Албаны хүмүүсийн мэдээлж буйгаар,  нэг жуулчин  200-300 юаны орлого оруулсан бөгөөд нэг өдөрт 70 жуулчин багадаа 14 мянган юан, монгол мөнгөөр тооцвол 4.9 сая төгрөгийн орлого оруулжээ. Бараа бүтээгдэхүүний тухайд хагас боловсруулсан бүтээгдэхүүн, шоколад, архи, арьсан эдлэл хамгийн эрэлттэй байсан аж. БНХАУ-ын жуулчид хил орчмын аялал жуулчлалыг хөгжүүлэхийн тулд юун түрүүнд дэлгүүрийг өргөтгөж, бараа бүтээгдэхүүний нэр төрлийг олшруулах хэрэгтэй байгааг дурьдаж байлаа. Тухайлбал, Эрээн хотод амьдардаг нэгэн эмэгтэй гоо сайхны бүтээгдэхүүн худалдан авахыг хүссэн ч, тус дэлгүүрт байхгүй байсан гэнэ. Ямартай ч, утаагүй үйлдвэрлэл гэгддэг аялал жуулчлалын салбарт Улаанбаатар төмөр замын аялал жуулчлалын товчоо нэгэн шинэ хуудсыг нээлээ.