Францын Ерөнхийлөгчийн сонгуулийн шийдвэрлэх шатны санал хураалтын дүн аль хэдийнэ олон нийтэд ойлгомжтой боллоо. Энэ сонгуульд ажиглагчдын таамаглаж байсны дагуу 39 настай Эдийн засгийн сайд асан Эммануэль Макрон үнэмлэхүй ялалт байгуулжээ.

Тэрбээр 65.5 хувийн саналаар тэргүүлсэн бол түүний өрсөлдөгч “Үндэсний фронт” намын дарга Марин Ле Пен 34.5 хувийн санал авсан байна. Сонгуульд ялалт байгуулснаар Э.Макрон хэд хэдэн анхны гэсэн тодотголыг хүртээд байгаа юм. Тухайлбал, Францын түүхэн хамгийн залуу Ерөнхийлөгч, басхүү 1958 онд орчин үеийн Бүгд найрамдах улсын үндэс суурь тавигдсанаас хойшхи анхны хэт баруун, эсвэл хэт зүүний намын харъяалалгүй Ерөнхийлөгч болж байна.

Сонгуулийн дүн нэгэнт гарсны дараа Э.Макроны мянга мянган дэмжигчид Парис хотын төв талбай Луврын музейн өмнө цугларч, шинэ Ерөнхийлөгчдөө баяр хүргэжээ. Харин ялалтын мэдэгдлээ хийхдээ шинэхэн Ерөнхийлөгч “Өнөө шөнө та бүхэн яллаа. Франц яллаа. Хүн бүр л бидэнд үүнийг боломжгүй гэж хэлж байсан. Гэхдээ тэд францыг мэдэхгүй. Бидэнд хүч чадал, хүсэл тэмүүлэл байна. Харин айдас алга. Франц түүхэндээ дахин шинэ хуудас нээлээ” хэмээжээ.

Гуравхан жилийн өмнө хэний ч мэдэхгүй Э.Макрон улс төрд анх удаагаа хөл тавьж байсан бол эдүгээ тэрбээр Францын төрийн тэргүүн боллоо.