Францын Ерөнхийлөгч Эммануэль Макрон Версалын ордонд ОХУ-ын төрийн тэргүүн В.Путинг хүлээн авч уулзлаа. Түүнийг Францын Ерөнхийлөгчийн сонгуульд ялалт байгуулснаас хойш хоёр улсын удирдагчид анх удаагаа нүүр тулан уулзаж буй нь энэ юм.

Эдүгээ Ерөнхийлөгчийн албан тушаалыг хашиж эхлээд сар ч болоогүй байгаа Макрон их Петр хаан 1717 онд Францад айлчилж байсан түүхэн үйл явдлын 300 жилийн ойд зориулсан үзэсгэлэнгийн нээлтэд В.Путиныг урьсан байдаг. Айлчлалын талаар өмнө нь Макрон “Би Орос орныг хүндэтгэдэг. 300 жил үргэлжилсэн дипломат харилцааны хүрээнд би Ерөнхийлөгч Путиныг урьсан юм” гэж ярьж байжээ.

Тэгвэл орон нутгийн цагаар даваа гарагт тэд уулзаж, Украин, Сирийн өнөөгийн нөхцөл байдлын талаар ярилцсан байна. Төрийн тэргүүнүүд харилцан санал солилцож, бас хоёр улсын харилцаанд үүссэн хурцадмал байдлыг эерүүлэхэд санал нэгджээ.

Харин уулзалтын дараа Макрон “маш илэн далангүй ярилцлага” боллоо гэж хэлсэн байна. Уулзалтын үеэр Макрон Францад хэд хэдэн удаа террорист халдлага явуулсан хэт даврагч “Лалын улс” бүлэглэлийн тухай дурьдаж, “Бидний хамтын ажиллагааны тэргүүлэх чиглэл нь терроризмын эсрэг тэмцэл” гэдгийг онцлоод тус хэт даврагч бүлэглэлийн албан бус нийслэл болох Даэш-аас эхлээд бүлэглэлүүдийг устгах саналтай байгаагаа илэрхийлжээ.

Макрон “Эдгээр асуудлыг ОХУ-тай хэлэлцэхгүйгээр шийдвэрлэх боломжгүй” гэсэн бол В.Путин “Бид терроризмтой тэмцэх асуудалд эн тэргүүнд анхаарлаа хандуулах хэрэгтэй гэж тохиролцсон” гэлээ.

Үүнээс гадна тэдгээр бүлэглэлүүдтэй тэмцэх арга зам, Сирийн иргэний дайн болон дотоодын байдал нь тогтворгүй байгаа Украин зэрэг улс орнуудын асуудлыг авч хэлэлцжээ. Энэ хүрээнд ОХУ-ыг Сиритэй хамтын ажиллагаагаа бэхжүүлэхэд уриалсан байна.

В.Путин Сирийн албан ёсны Засгийн газар болох Башар ал Ассадын дэглэмийг дэмждэг бөгөөд Сирийн хямралтай холбоотой асуудлаас үүдэн Барууны орнууд, ОХУ-ын харилцаа муудаж эхэлсэн байдаг. Тэгвэл Э.Макрон уулзалтын үеэр Сирид химийн зэвсэг ашигласан нь “улаан гэрэл” ассантай ялгаагүй гэж үзэж буйгаа илэрхийлсэний зэрэгцээ Франц шууд хариу үйлдэл үзүүлнэ хэмээн Ассад, ОХУ-ын Засгийн газарт анхааруулсан маягийн мэдэгдэл хийгээд амжсан гэнэ.

Тэдний уулзалт гурван цаг үргэлжилжээ. Уулзалтын дараа хоёр орны төрийн тэргүүн хэвлэлийн хурал зарласан байна. Хурлаар Францын Ерөнхийлөгч Э.Макрон Сирийн асуудлыг сөргөлдөгч талуудтай нь ярилцах хэрэгтэйг онцолжээ.

Тэр дундаа Башар Асадын талынхантай Сирийн нөхцөл байдлыг хэрхэн зөөлрүүлэх талаар ярилцах хэрэгтэй гэсэн байр суурьтай байгаагаа илэрхийлсэн байна. Мөн сонгуулийн штабын компьютеруудад нь Оросын хакерчид халдсан гэх мэдээлэлтэй холбоотойгоор Э.Макрон В.Путинаас хариулт хүссэн бөгөөд В.Путин “энэ бол ямар ч баримтгүй бөгөөд ор үндэслэлгүй гүтгэлэг” гэж хариулсан байна.