БНСУ-д ээлжит бус Ерөнхийлөгчийн сонгууль болж, Мүн Жэ Ин ялалт байгуулан тангаргаа өргөснөөс хойш 100 дахь өдөр өчигдөр тохиолоо. Энэ өдрийн хүрээнд тус улсын Ерөнхийлөгч хэвлэлийн зурал зарлаж, өнгөрсөн өдрүүдэд хийж хэрэгжүүлсэн ажил, амжилт хийгээд цаг үеийн бусад анхаарал татсан асуудлаар хэвлэлийнхний сонирхсон асуултад хариулт өгчээ.

Тэрбээр ойрын өдрүүдэд дэлхий нийтийн анхаарлын төвд байгаа Хойд Солонгос болон АНУ-ын сөргөлдөөний талаар байр сууриа мөн илэрхийлсэн байна. Мүн Жэ Ин Пхеньяны цөмийн зэвсэг, баллистик пуужингийн хөгжүүлэлт нь “улаан шугамд тулсан” гэдгийг онцлоод “Хойд Солонгосын өдөөн хатгалгаас сэрэмжлэх хэрэгтэй”-г уриалжээ. Нөгөөтэйгүүр, “Солонгосын хойгт дахин цус асгаруулсан дайн гарахгүй гэдэгт итгэлтэй байна” хэмээн, сөргөлдөөн, мөргөлдөөнөөс зайлсхийх өөрийн байр сууриа илэрхийлсэн байна.

Харин сэтгүүлчид түүнээс “улаан шугам” гэх зүйрлэлийг нь тодруулж асуухад Ерөнхийлөгч Мүн “Хойд Солонгос тив алгасагч пуужинг бүтээж, цөмийн цэнэг хошуугаар тоноглон, зэвсэглэсэн явдал юм” гэж тайлбарлажээ. Мөн үргэлжлүүлэн, “Пхеньян дахин өдөөн хатгасан үйлдэл гаргавал, өнөөгийнхөөс илүү хатуу хориг арга хэмжээтэй тулгарч, тэсвэрлэхэд бэрх болох болно” хэмээн сэрэмжлүүлэн, өдөөн хатгасан үйлдлээ зогсоохыг Ким Жон Унд уриалсан байна.

Түүнчлэн, “Солонгосын хойгт хэн ч БНСУ-ын зөв­шөө­рөлгүйгээр цэргийн ажиллагаа явуулах боломж­гүй” гэжээ. Мүн Жэ Ин нь Ерөнхийлөгчийн сонгуульд өрсөлдөх үеэсээ Хойд Солонгостой харилцах харилцаанд эргэлт гаргаж, дайсагналаар бус эв зүйгээр асуудлыг зохицуулна гэдгээ мэдэгдэж байсан билээ.

Тиймдээ ч, АНУ-тай хэлэлцээр хийж,  Солонгосын хойгт ямар нэг цэргийн ажиллагаа явуулахын өмнө Сөүлтэй зөвшилцөж зөвшөөрөл авах талаар Доналд Трамптай тохиролцсон байдаг. АНУ-ын төрийн тэргүүн  Хойд Солонгосыг галаар цохино гэж мэдэгдсэнээс болж Пхеньянаас Гуам арал руу “Хвасон-12”  пуужингаа онилчихоод байгаа юм.

Гэхдээ Хойд Солонгосын удирдагч АНУ-ыг түрүүлж үйлдэл хийхийг хүлээхээр шийдсэнээр нөхцөл байдал намжсан билээ. Мүн Жэ Ин мөн “Хойд Солонгосын эсрэг авсан хоригоо чангатгаж, дарамт шахалтаа нэмэх зарчмаар асуудлыг тайван замаар шийдэх нь олон улсын байр суурь юм. Хориг ч гэсэн Хойд Солонгосыг хэлэлцээрийн ширээнд авчирахын тулд авсан арга хэмжээ юм” хэмээн үүссэн асуудлыг тайван замаар шийдвэрлэхийг хүсч буй өөрийн үзэл бодлоо хэвлэлийн хурлын үеэр онцлон дурьджээ.

Түүний хэлсэн үг Хойд Солонгос, АНУ-ын хооронд дайн гарах вий гэсэн болгоомжлолыг үндсэндээ намжааж өглөө. Олон улсын ажиглагчид ч хоёр улсын хоорондын сөргөлдөөнд санаа зовох зүйлгүй гэсэн байр суурийг ч илэрхийлээд байгаа юм. Дайн болохгүй байх хэд хэдэн шалтгаан байгаа гэж мэргэжилтнүүд үзэж буй бөгөөд хамгийн гол шалтгаан нь сөргөлдөгч хоёр талын аль аль нь дайныг хүсээгүйтэй холбоотой гэнэ.

Пхеньяны тухайд Солонгосын хойгийн цус асгаруулсан дайнд хэн нь ч хожоогүй гэдгийг мэдэж буй учраас Ким Жон Ун дараагийн Муаммар Каддафи, Саддам Хусейн болохыг хүсэхгүй. Харин АНУ Пхеньян руу довтлохын тулд Сөүлтэй зөвлөлдөхөөс гадна тус улсын ойрын холбоотон болох Япон, БНСУ дайны улмаас ихээхэн хохирол амсах тул шийдвэрийг дэмжихгүй, дээр нь хэдэн мянган хүний цус урсах учир түрүүлж хөдлөхгүй гэж BBC агентлагийн Батлан хамгаалах асуудал хариуцсан мэргэжилтэн Жонатан Маркус үзэж байна.