Хойд Солонгос улс Япон тэнгисийн зүг гурван пуужин харвасны нэг нь хөөрөөд удаагүй байхдаа дэлбэрч, үлдсэн хоёр нь 250 км зам туулсан гэх мэдээлэл гарсан. Тэдгээр гурван пуужинг Ганвон аймгаас хөөргөжээ.  Хойд Солонгос тив алгасагч баллистик пуужингийн туршилт хийсэнтэй холбоотойгоор НҮБ-ын Аюулгүйн зөвлөл энэ сарын 5-ны өдрийн хуралдаанаар АНУ-ын талаас тавьсан саналыг хэлэлцэж, нийт гишүүдийн 100 хувийн саналаар Пхеньяны эсрэг авах хориг арга хэмжээгээ чангатгахаар шийдвэрлэсэн юм.

 

Энэ шийдвэрийн хүрээнд НҮБ-ын гишүүн орнууд Хойд Солонгосын нүүрс, төмөр, төмрийн хүдэр, хар тугалга зэрэг ашигт малтмалын импортдоо цэг тавьж, тус улсын гадаад худалдааны банкны дансыг царцааж, тэнгисийн цэргийн хөлөг онгоцыг нь бүх улсын боомт руу орохыг хориглосон. Үүний дараа АНУ-ын Ерөнхийлөгч Доналд Трамп Пхеньяныг сүрдүүлсэн мэдэгдэл хийснээр Ким Жон Ун Гуамын арал руу пуужин харвах цэргийн стратеги боловсруулж эхэлсэн гэдгээ мэдэгдсэн удаатай. Мөн БНСУ, АНУ-ын жил бүр болдог хамтарсан цэргийн сургуулилт Солонгосын хойгт эхэлж, эдүгээ ид дундаа өрнөж буй. Гэхдээ хоёр талын аль аль нь хэн нэгэн нь түрүүлж, өдөөн хатгасан үйл ажиллагаа явуулах тэр үед дайн эхэлнэ гэж мэдэгдсэний дараа нөхцөл байдал намжсан. 

 

Харин энэ үед Пхеньян дахин гурван нисдэг биетийг хөөргөн туршилт хийснээр байдал хурцдах вий гэсэн болгоомжлол бүс нутагт үүсээд байв. 

 

Тэгвэл энэ удаад Пхеньян нисдэг биетээ Гуам, эсвэл АНУ-ын эзэмшлийн аль нэг нутаг дэвсгэр рүү чиглүүлсэнгүй. Үүнийг АНУ-ын Номхон далайн командлал ч баталсан юм. Түүнчлэн,  БНСУ-ын Ерөнхийлөгчийн Тамгын газраас Пхеньяны харвасан нисдэг биетийн талаар мэдэгдэл хийж,  пуужин биш байсан гэдгийг  тодотгожээ. Тэд  “Их буу, баллистик пуужин, тив алгасагч пуужин аль нь ч биш байсан.  Цэргийн сургуулилтынх нь  нэг хэсэг байсан гэж үзэж байна” хэмээсний зэрэгцээ  өдөөн хатгасан үйл ажиллагаа биш гэдгийг мөн хүлээн зөвшөөрчээ. 

 

Харин “Франц пресс” агентлагийн сэтгүүлчийн тэмдэглэснээр энэ удаагийн Пхеньяны үйл ажиллагаа өдөөн хатгалгаас зайлсхийж, хэлэлцээрийн ширээний ард суух сонирхол байгааг нь илтгэсэн явдал боллоо гэж дүгнэн бичсэн байна. 

 

БНСУ-ын Хөх ордны төлөөлөгч хэвлэлийн бага хурлын үеэр “Богино зайн нисдэг биет байсан. БНСУ-АНУ-ын хамтарсан цэргийн сургуулилт ид дундаа өрнөж буй энэ үед биш, өөр тохиолдолд бол Үндэсний аюулгүй байдлын байнгын хорооны төвшинд ярих шаардлагагүй. Япон ч гэсэн Үндэсний аюулгүй байдлын хороогоо хуралдуулахаас татгалзсан” гэж ярьжээ. 

 

Харин тус нисдэг биет чухам юу байсан талаар сэтгүүлчид түүнээс лавлаж асуухад “Хойд Солонгос ямар нисдэг биет харвасныг нь тогтооход хэдэн өдөр, цаг шаардлагатай байх. БНСУ-АНУ-ын тал хамтран хэлэлцсэний үндсэн дээр нэг үр дүн гарах байх” гэсэн байна. 

 

Өнгөрсөн долоо хоногт Вашингтон Хойд Солонгостой харилцах харилцаанд нааштай өөрчлөлтүүд гарч байгааг мэдэгдэж байв. Тухайлбал АНУ-ын Төрийн нарийн бичгийн дарга Рэкс Тиллерсон “Пхеньяны дэглэм өмнө нь үзэгдэж байгаагүйгээр асуудалд тэвчээртэй хандаж эхэлснийг мэдэгдэхэд таатай байна” хэмээж, ойрын өдрүүдэд талууд хэлэлцээрийн ширээний ард сууж магадгүй гэж мэдэгдсэн. 

 

Мөн АНУ-ын Ерөнхийлөгч Доналд Трамп Ким Жон Уныг АНУ-д хүндэтгэлтэй хандаж эхэлснийг онцолж, “Зарим эерэг дүн гарах байх” гэсэн хүлээлт­тэй байгаагаа илэрхийлж байлаа. Нөгөөтэйгүүр, Пхеньяны цэргийн командлагч Ким Жон Ун улсдаа цэргийн сургуулилт зохион байгуулсан гэх мэдээлэл бий. Тиймээс, тус харвасан нисдэг биет энэ удаагийн сургуулилтынх нь нэг хэсэг байсан байх магадлалтай гэдгийг БНСУ, АНУ-ын тал ч мэдэгдэж байгаа юм. 

 

Ямартай ч, АНУ болоод БНСУ-ын талын дээрх мэдэгдэл болон шахалтууд үр дүнгээ өгвөл Пхеньян “Цагаан тугаа” өргөж, хэлэлцээрийн ширээний ард сууж магадгүй нь.