АНУ-ын өмнөд этгээдийн Техас мужийг “Харви” хар салхи дайрч, ширүүн бороо үргэлжлэн орсны улмаас бүс нутагт үерийн гамшиг нүүрлэж,  хамгийн сүүлд авсан мэдээллээр таван хүн нас баржээ. Одоо ч ширүүн бороо үргэлжлэн орсоор байгаа бөгөөд мужийн эрх баригчид онц байдал зарлан 3000 цэргийн алба хаагчийг дайчлан гамшгийн бүс рүү илгээж, нүүлгэн шилжүүлэх болон аврах ажиллагааг үргэлжлүүлсээр байна.  

 

Техас мужийг энэ сарын 25-нд “Харви” хар салхи дайрсан юм. Түүнээс хойш цаг агаарын байдал харьцангуй тогтворжсон ч, бороо үргэлжлэн орсны улмаас  Техасын  Хьюстон зэрэг  томоохон хотууд үерт автжээ. 

 

Орон нутгийн агентлагууд бүхэлдээ усаар хүрээлэгдсэн  орон сууц, байшингууд болон асрах газартаа өвдгөөр татсан усанд зогсох тэргэнцэртэй настнуудын ахуй байдлыг харуулсан бичлэгийг  цацсан юм.  

 

Одоогоор хохирлын хэмжээг тооцох боломжгүй байна. Гэхдээ хамгийн сүүлд авсан мэдээллээр гамшгийн улмаас таван хүн нас барсан нь тогтоогдсон талаар эх сурвалжууд мэдээлж байгаа юм. АНУ-ын Үндэсний цаг уурын агентлагийн албан ёсны твиттер хуудаст “Урьд нь тохиож байгаагүй гамшиг” хэмээн бичиж, цаашид ч бороо үргэлжлэн орох төлөв ажиглагдаж байгааг анхаарууллаа. Улсад нь томоохон гамшиг нүүрлэсэнтэй холбоотойгоор Ерөнхийлөгч Доналд Трамп ч Техас мужид ажиллахаар болжээ. Тэрбээр өнөөдөр тус мужид очиж, үүссэн нөхцөл байдалтай танилцах юм байна. 

 

Мөн Хьюстон хотын захирагч хэвлэлийнхэнд мэдээлснээр, нэг шөнийн дотор 56 мянга гаруй тусламж хүссэн дуудлага онцгой байдлын албанд ирсэн байна. Энэ тоо цаашдаа ч нэмэгдэж болзошгүй юм байна. 

 

Хамгийн чухал нь АНУ-даа олон тооны газрын тосны байгууламжуудтай, нефт бүтээгдэхүүний өлгий нутаг гэгддэг Техас мужийн эрэг орчимд энэ удаагийн хар салхи, үерийн гамшиг томоохон сөрөг нөлөө учруулж болзошгүй байгааг албаныхан онцолж байгаа юм. Учир нь бороо үргэлжлэн орж, барилга байгууламж усанд автсанаар дээрх газрын тосны байгууламжууд ээлж дараалан тоног төхөөрөмжийн зогсолт хийж эхлээд байна. Тэдний дунд өдөрт 560500 баррел газрын тос олборлодог АНУ-ын газрын тосны салбар дахь хоёр дахь том компани болох “Exхon  mobile” үерийн улмаас олборлолтоо зогсоож буйгаа мэдэгдсэн бол мөн өдөрт 325700 баррел нефт олборлодогоороо томоохонд тооцогддог Европын газрын тосны “Royal dutch shell Pic” компани ч ихэнх ажилчдаа аюулгүй бүс нутаг руу нүүлгэн шилжүүлж, үйл ажиллагаагаа зогсоолоо. Тус компанийн тоног төхөөрөмжийн зогсолт нэг долоо хоногийн хугацаагаар үргэлжилж магадгүй байна.  

 

Нөгөө талаар, Техас мужийн нефт олборлогч “Motive enterprises” компани зэрэг зарим газрын тосны үйлдвэрүүд ноцтой хохирол амсаагүй тул үйл ажиллагаагаа үргэлжүүлэхээр төлөвлөж байгаа гэнэ. Гэхдээ томоохон нефт үйлдвэрлэгч компаниуд тоног төхөөрөмжийн зогсолт хийсэн учир цаашдаа газрын тосны бүтээгдэхүүний нийлүүлэлт багасч, үнэ нь өсч магадгүй төлөв ажиглагдаж байгааг шинжээчид онцолж байна. Учир нь энэ сарын 27-нд гэхэд  Нью-Йоркийн хөрөнгийн биржид баррель нефтийн үнэ хэдэн цагийн хугацаанд савалж, нэг цагийн дотор л зургаан хувиар өсчээ. 

 

Техас мужийн эрэг орчимд, тэр дундаа үерт өртөж ноцтой хохирол амсаад буй Хьюстон хотод  АНУ-ын газрын тосны үйлдвэрүүдийн 30 орчим хувь нь байрладаг гэнэ. “lipow oil associates” компанийн Ерөнхийлөгч Эндрю Липов “Энэ бороо Хьюстоны эрчим хүчний дэд бүтцийг бүхэлд нь аюулд оруулах эсэхийг одоогоор хэлж мэдэхгүй байна. Хэрвээ үер ус зайлуулах насосыг усанд автуулах юм бол Техасын үйлдвэрүүд нэг сар хүртэлх хугацаагаар зогсох болно” гэж хэвлэлд ярьсан байна. 

 

 Хэрэв гамшгийн улмаас газрын тос олборлогч үйлдвэрүүд тоног төхөөрөмжийн зогсолт хийвэл, эрчим хүчний үнэд өөрчлөлт орж мэдэхээр байна.