Олон улсын шаардлагыг үл тоож, цөмийн зэвсэг, баллистик пуужингийн туршилтаа үргэлжлүүлж буй Хойд Солонгос тив алгасагч пуужинд суурилуулах боломжтой жижигрүүлсэн устөрөгчийн бөмбөгтэй болсноо олон улсад зарлав. KCNA агентлагийн мэдээлэлд залуу удирдагч Ким Жон Ун өөрийн эрдэмтдийн бүтээсэн устөрөгчийн бөмбөгийг биеэр үзэж, танилцсан тухай өгүүлсний зэрэгцээ гэрэл зургийг нь нийтэлжээ. Мөн өнгөрсөн долдугаар сард туршсан шинэ тив алгасагч баллистик пуужинд уг бөмбөгийг суурилуулахаар бэлтгэж байгаа тухай өгүүлсэн байна. Шинэ баллистик пуужин нь 10 мянган км зайд буюу АНУ-ын эх газрын аль ч цэгт цохилт өгөх чадалтай аж.

Зарим мэргэжилтнүүд Хойд Солонгосыг зургаа дахь удаагийн цөмийн зэвсгийн туршилтдаа бэлтгэж буй гэх мэдээллийг хиймэл дагуулын зурагт үндэслэн мэдэгдэж байсан юм. Тус улс дөрөв болон тав дахь цөмийн зэвсгийн туршилтаа 2016 онд гүйцэтгэсэн байдаг. Өнгөрсөн оны нэгдүгээр сард хийсэн туршилтаа устөрөгчийн бөмбөг байсан гэж мэдэгдсэн ч, салбарын мэргэжилтнүүд эргэлзэж байсан удаатай. Гэхдээ уг мэдээнд цөмийн зэвсгийн туршилтын талаар нэг ч үг, өгүүлбэр дурьдаагүй байна.

Гэтэл уг мэдээллээс хэдхэн цагийн дараа Хойд Солонгосын зүүн хойд хэсэг, Япон, БНСУ, хилийн орчмын бүс нутагт маш хүчтэй чичиргээн мэдрэгдлээ.  АНУ-ын Геологийн судалгааны хүрээлэнгээс мэдээлснээр Хойд Солонгосын Сунжипэгамаас зүүн хойш 24 км зайд 6.3 магнитудын хүчтэй газар хөдөлсөн байна. Газар хөдлөлтийн гүн 0 км-т байжээ. Харин БНСУ-ын цаг уурын мэргэжилтнүүд Хойд Солонгосын хойд Хамгён мужийн орчимд өчигдөр 00:36 цагийн үед хүний хүчин зүйлийн нөлөөлөлтэй чичиргээн мэдрэгдсэн талаар хэвлэлд мэдээлсэн байна. Хүч нь Пхеньяны тав дахь цөмийн зэвсгийн туршилтаас 5-6 дахин, дөрөв дэх туршилтаас 11 дахин хүчтэй байжээ.

Чичиргээн ОХУ-ын хилийн орчимд ч ажиглагдсан аж. Владивосток дахь ОХУ-ын шинжлэх ухааны академийн салбар байгууллагаас мэдээлснээр хоёр улсын хилийн орчимд 4.5 магнитудын хүчтэй газар хөдөлсөн байна. Нэгэн гэрч “Хэдэн секундын турш газар чичирхийлж, ширээ, гэрлийн шил хөдөлж байсан. Маш их айсан. Цаашдаа юу болох бол гэдэгт би үнэхээр санаа зовж байна” хэмээн “NHK” агентлагт ярьсан байв.

Газар хөдлөлтийн чичиргээн бүс нутаг даяар мэдрэгдсэний дараа БНСУ-ын Ёнхап агентлаг эх сурвалжийн мэдээлэлд үндэслэн Хойд Солонгос зургаа дахь удаагийн цөмийн зэвсгийн туршилтаа хийсэн талаар дамжууллаа.

Пхеньян өнгөрсөн оны есдүгээр сарын 9-нд болсон Хойд Солонгос улсыг тунхагласны 68 жилийн ойн баяраар хийсэн цөмийн зэвсгийн туршилтаас хойш яг нэг жилийн дараа зургаа дахь удаагийн туршилтаа хийж буй нь энэ юм. Харин АНУ-ын Ерөнхийлөгчөөр Доналд Трамп сонгогдсоноос хойш анх удаа цөмийн туршилт хийж байна.

Пхеньян ч мөн  устөрөгчийн бөмбөг амжилттай туршсанаа зарласан юм. Тус улсын төрийн өмчит KCNA агентлаг манай цагаар 14:30 цагийн орчимд зургаа дахь удаагийн цөмийн зэвсгээ туршсанаа зарлалаа. Тус мэдэгдэлд “Тив алгасагч баллистик пуужинд суурилуулах боломжтой жижигрүүлсэн устөрөгчийн бөмбөгийн туршилт амжилттай болсон. Туршилт өнөөдрийг хүртэлхээс асар их хүчтэй, найдвартай ажиллагаатай байлаа. Устөрөгчийн бөмбөгийн туршилт амжилттай болсоноор  манай улсын цөмийн цэнэгт хошуугаа улам боловсронгуй, найдвартай ажиллагаатай болгох зорилт биелэлээ олох  боломжтой боллоо” хэмээжээ.

Хойд Солонгосын энэ удаагийн туршилт НҮБ-ын Аюулгүйн зөвлөлийн шийдвэрийг зөрчсөн төдийгүй АНУ-ын Ерөнхийлөгч Доналд Трампын байр суурь улам чангарахад нөлөөлөх нь гарцаагүй гэдгийг ажиглагчид хэлж байна. Түүнчлэн, БНХАУ, ОХУ, Олон улсын нийгэмлэгээс тус улсад тавих хориг арга хэмжээ, дарамт шахалт улам нэмэгдэж болзошгүй байгаа юм. Ээлжит туршилттай холбоотойгоор АНУ, Өмнөд Солонгос, Япон улсууд ямар хариу арга хэмжээ авахаа хэлэлцэж эхэлсэн байна. Хойд Солонгос долдугаар сарын 4, 28-нд хоёр удаа “Хвасон 14” пуужингийн туршилт хийсэн юм. Мөн наймдугаар сарын 29-нд Хвасон-12 дундын зайн тусгалт пуужингийн туршилт хийсэн бөгөөд тэр нь Японы Хоккайдо арлын дээгүүр өнгөрч, Номхон далайд унасан байдаг.

Хойд Солонгосын туршилтууд

• -2006 оны аравдугаар сарын 9-нд эхний цөмийн зэвсгийн туршилт
• -2009 оны тавдугаар сарын 25-нд хоёр дахь туршилт
• -2013 оны хоёрдугаар сарын 12-нд гуравдахь туршилт
• -2016 оны нэгдүгээр сарын 6-нд дөрөвдэх туршилт
• 2016 оны есдүгээр сарын 9-нд тавдахь туршилт
• 2017 оны есдүгээр сарын 3-нд зургаа дахь туршилт