Хойд Солонгосын Гадаад хэргийн яам өнөөдөр НҮБ-ын Аюулгүйн зөвлөлөөс баталсан шинэ хориг арга хэмжээг “Өдөөн хатгалга” хэмээн мэдэгдэж, зэвсгийн хөгжүүлэлтээ цаашид үргэлжлүүлсээр байх болно гэдгээ мэдэгдлээ. Хойд Солонгос энэ сарын 3-нд зургаа дахь удаагаа цөмийн зэвсэг туршсан юм. Үүнтэй холбоотойгоор НҮБ-ын Аюулгүйн зөвлөл даваа гарагт хуралдаж, тус улсын газрын тосны бүтээгдэхүүний импортод хориг тавих гэх мэт хэд хэдэн хориг арга хэмжээг авсан байдаг.

Тэгвэл өнөөдөр Хойд Солонгосын Гадаад хэргийн яам “KCNA” агентлагаар дамжуулан мэдэгдэл хийжээ. Тэрхүү мэдэгдэлдээ тус хориг арга хэмжээг “БНАСАУ өөрийгөө хамгаалах эрхийг булааж, эдийн засагт ноцтой хохирол учруулах замаар манай улс болон ард түмний амьсгалыг таслах зорилготой өдөөн хатгасан үйл ажиллагаа” хэмээн шүүмжилсэн байна.

Мөн “АНУ-ын санаачилсан хууль бус хориг арга хэмжээ нь БНАСАУ-ын сонгосон зам зөв гэдгийг батлах боломж болж байна. Бид Үндэстний эрх ашиг, тусгаар тогтнолоо хамгаалахын тулд бүхий л хүчээ дайчлан ажиллах болно” хэмээжээ. АНУ болон түүний холбоотон улс орнууд илүү хатуу хориг тавих замаар Хойд Солонгосын удирдагч Ким Жон Унд шахалт үзүүлж, хэлэлцээрийн ширээний ард суулган, цөмийн зэвсгийн хөгжүүлэлтийг зогсоохыг зорьж буй.

Гэвч, хоригийг чангатгаж, Хойд Солонгосын цөмийн зэвсгийн хөгжүүлэлтийг зогсоох боломжтой гэдэгт зарим ажиглагчид ч эргэлзэж эхэлжээ.