АНУ-ын Ерөнхийлөгч Доналд Трамп Цагаан ордны Харилцаа холбоо, олон нийттэй харилцах албаны даргаар загвар өмсөгч бүсгүйг томилжээ.

Өмнө нь тус албанд Энтони Скарамуччи томилогдож байсан ч, ердөө 10 хоногийн дараа хамтран зүтгэгчдийнхээ эсрэг мэдээллийг сэтгүүлчдэд өгсөн гэх хэргээр албан тушаалаасаа огцорсон юм. Тэгвэл өчигдөр 28 настай Хөүп Хикс гэх бүсгүйг түүний оронд томилсон аж. Бүсгүй Энтониг ажлаасаа чөлөөлөгдсөнөөс хойш Цагаан ордны Харилцаа холбоо, олон нийттэй харилцах албаны даргын үүргийг түр орлон гүйцэтгэж байгаад жинхэлсэн нь энэ бололтой. Х.Хикс ч уг мэдээллийг өөрөө баталсан байна.

Цагаан ордны Олон нийттэй харилцах албаны шинэ дарга өмнө нь загвар өмсөгчөөр ажиллаж байжээ. Мөн пиарын чиглэлээр мэргэшсэн нэгэн бөгөөд Д.Трамп болон түүний гэр бүлийн эерэг имижийг хадгалахад тусладаг байсан гэнэ. Түүнчлэн, Ерөнхийлөгчийн ууган охин Иванка Трампыг ч дэмжиж тусалж иржээ. Харин улс төрд ажиллаж байсан туршлагагүй юм байна. Өнгөрсөн жилийн Ерөнхийлөгчийн сонгуульд ч анх удаагаа Д.Трампын хэвлэлийн багийг хариуцан ажиллаж байжээ.