ОХУ-ын нийслэл Москва хотын хэд хэдэн худалдаа үйлчилгээний байгууллага, их сургууль, галт тэрэгний буудалд тэсрэх бодис байрлуулсан гэх дуудлага өчигдөр цагдаагийн байгууллагад ирж, 15 мянга гаруй хүнийг нүүлгэн шилжүүлсэн байна.

Гэхдээ хаанаас ч тэсрэх бодис олдоогүй аж.

ОХУ-ын Ерөнхийлөгчийн хэвлэлийн төлөөлөгч Дмитрий Песков тагнуулын байгууллага эл мэдээллийг шалгаж байгаа гэж мэдээлжээ.  Нэрээ нууцалсан нэгэн эх сурвалж ТАСС агентлагт “Улаан талбайд байрладаг их дэлгүүрээс эхлээд 30 гаруй газарт тэсрэх бөмбөг тавьсан гэх мэдээлэл ирсэн” гэж ярьсан байна.

Хоёр өдрийн өмнө ч гэсэн тэсрэх бодис суурилуулсан гэх мэдээлэл цагдаагийн байгууллагад ирж, 45 мянган хүнийг нүүлгэн шилжүүлж байжээ.