НИТХ-ын ээлжит III хуралдаан өнөөдөр болсон юм. Хуралдааны хурлын төлөөлөгчийн хэлсэн онцлох үгсийг түүвэрлэн хүргэе.

НИТХ-ын төлөөлөгч Н.Баярмөнх: Тээвэр ложистикийн асуудлыг нь эдийн засгийн чөлөөт бүстэй холбож байгуулах асуудлыг ярих нь зүйтэй. Түүнчлэн Монгол улсын музейн үзвэрийн 80 орчим хувь нь агуулахад хадгалагдаж байна гэсэн мэдээлэл байдаг. Эдгээр үзвэрийг шинэ нисэх буудал ашиглалтанд орохтой зэрэгцэн Чингис хаан нисэх онгоцны буудлыг ашиглан аялал жуулчлалын төв, музей болгож болох юм. Энэ асуудалд Р.Дагва дарга, Хотын дарга С.Батболд нар чөлөөт бүс байгуулах асуудалтай холбон ажил хэрэг болох талаас нь анхаарч ажиллаасай гэж хүсэх байна.

 НИТХ-ын дарга С.Амарсайхан: Улаанбаатар чөлөөт бүсийг байгуулах нь нийслэлчүүдийн ирээдүйн ажил амьдрал, хотын хөгжлийн амин чухал асуудал. Ажилтай,орлоготой иргэнтэй, эдийн засгийн чадавхитай хот л тогтвортой хөгждөг

НИТХ-ын төлөөлөгч Ц.Сандаг-Очир: Бид нар маш чухал асуудлыг хэлэлцэж байна. Хотын иргэдийг орлоготой, ажил амьдралтай болгох, хотыг эдийн засгийн хувьд 5-10 жилийн стратегийн том асуудлыг ярьж байхад төлөөлөгчид идэвхгүй хандаж байгаад харамсаж байна. Миний хувьд энэ асуудлыг бүх талаар дэмжиж байгаа. Гагцхүү танилцуулгад дурьдсан 6 байршил дээр биш аль нэг байршилыг нь сонгоод, нэршлийг нь зөв гаргаад явах, энэ тал дээр илүүтэй судалгаа хийх хэрэгтэй.

НИТХ-ын төлөөлөгч Ц.Одонтунгалаг: НИТХ-аас санаачлан зохион байгуулсан "Газрын харилцаа" хэлэлцүүлэгт өргөдөл гомдлоо гаргасан иргэнийг СХД-ийн Газрын албаны дарга Б.Алтанхундага гэдэг залуу дарамталж, загнан "Яах гэж НИТХ-аас зохион байгуулсан арга хэмжээнд өргөдөл өгсөн юм" гэж хэлсэн байх юм. Ингэж "том толгой" гаргаж иргэдийг загнаж дарамталсан СХД-ийн Газрын албаны дарга Б.Алтанхундагатай хариуцлага тооцох ёстой.