Эдүгээ Улаанбаатар хотод  төрийн яамд түний харьяа агентлагуудаас авахуулаад дүүрэг,  аж ахуйн нэгж байгууллагууд бүгд л машин тавих зогсоолоо цагийн мянган төгрөгөөр үнэлэх болжээ.  Бүр дэлгүүр, хоршоо, төмөр замын автовокзал, орон нутгийн зорчигч тээврийн  Драгон төв   хүртэл.  Үзвэр, үйлчилгээний газруудын тухайд хэлэх ч үг байхгүй.  

Өчигдөр гэхэд л гурван яам гэгддэг Хөдөлмөр нийгэм хамгаалал, Уул уурхайн яамны зогсоол дээр нэгэн төрийн албан хаагч “  Төрийн албан хаагчид цалин муутайн дээр сүүлийн  хоёр сар мөнгөний бараа хараагүй ядаж явахад, яам тамгын газраар гүйх хэрэг байсхийгээд гарахыг нь яана. Тэгээд л өнөө банкны зээлээр авсан хөл дүүжилдэг унаа шүү юмаараа  санжигнаад очихоор зогсоол олдохгүй зовоож, яамыг гурвантаа тойрсны эцэст  төлбөртэй зогсоол руу нь орох болдог. Цаг нь мянга. Лут шүү. 

Сайд дарга нарт дуудагдсан бол орох ээлжээ хүлээн хамгийн багадаа хоёр цаг хүлээхийн зовлон эдлэхийн дээр   орсон хойноо  дор хаяж цаг болдог. Ингээд л мөнгөний машины тоолуур эргэж өдөр хоол идэхээр эхнэрээ царайчилж авсан  таван мянган төгрөгийн тал нь  явчихаж байгаа юм чинь” хэмээн бухимдчихсан зогсч байсан.  Би ч ялгаагүй,  зогсоолын мөнгөө өгчихөөд тэндээсээ хөдлөөд шинээр томилогдсон аентлагийн даргатай уулзах гээд Спортын төв ордон дээр ирэхэд өөдөөс ийшээ орох гэж байгаа бол тасалбараа ав. Цаг нь 500 төгрөг гээд  урт модны үзүүрт хавчуулсан тасалбар сарвайж байлаа.  Тэнд 1500 төгрөгийн төлбөр төлчихөөд гарсан. Энэ ер нь байх үйлчилгээ мөн үү.  

Дэлхийн жишигт улс хоорондын болоод  хот хоорондын зам ашигласны төлбөр гэж төлдөг болохоос  дэлгүүрээр үйлчлүүлснийхээ төлөө хэтэвчтэйгээ ноцолдож байхыг санахгүй л юм.  Тиймээс ямар тохиолдолд төлбөр төлөх ёстойг зааглаж өгөх цаг болжээ. Нөгөөтэйгүүр, тухайн зогсоолоосоо олсон мөнгөө юунд зарцуулдаг нь сонин байна. Жижиг аж ахуйн нэгжийн тухайд мөнгө хураагчийнхаа цалинг өгөөд үлдсэнээр нь угаалгын нунтаг авдаг гэж дуулдсан. Харин бүх зардлыг нь төр даадаг төрийн яамдууд, төрийн үйлчилгээний байгууллагууд  юунд зарцуулах гэж зогсоолоо үнэлдэг   байж таарах вэ. Тэгээд ч төр  байгаа орон тоогоо хэрхэн яаж зохицуулахаа мэдэхгүй тэвдэж байхад дээр нь хоср ээлжийн тасалбар түгээгчийн орон тоог нэмж зохицуулах хэрэг гарчээ. Үнэндээ сайд  нар зогсоолоо үнэл хэмээн тушаал гаргадаггүй байлтай.

Эсвэл доогуур ажилладаг тамгын газрын дарга нар нь  өдөр тутмын хэрэглээгээ хангах гэж зогсоолоо үнэлсэн хэрэг үү.   Нөгөөтэйгүүр, үйлчилгээний томоохон газрууд тухайлбал UB март зэрэг  аж ахуйн нэгжүүд зогсоолоо хувь хүмүүст түрээслүүлчихээд сардаа түрээс гэж хэдэн төгрөг авчихаад сууж байдаг юм билээ.   Үүнийг хянадаг байгууллага ч алга байна. Тиймээс зогсоол гэж хувьдаа хөл дүүжлэх унаатай иргэдээ ад үздэг тогтолцооноос ангижрах цаг болжээ, Улаанбаатарчууд аа.