Буриадын Улаан-Үд хотод есдүгээр сарын 11-15-нд “Алтан Сэргэ” олон улсын театрын наадам болно. Тус наадамд Улсын драмын эрдмийн театрын уран бүтээлчид анх удаа өргөн бүрэлдэхүүнтэй оролцох гэнэ.

Энэ жилээс эхлэн уг наадмыг уралдаант хэлбэрээр зохион байгуулах бөгөөд наадамд “Ромео, Жульетта” жүжгээрээ оролцохоор болжээ. Өмнөх жилүүдэд Ардын уран зохиолч Б.Лхагвасүрэнгийн “Тамгагүй төр”, В.Красногоровын “Би ч гэсэн жаргамаар байна” гэсэн жүжгүүдээр оролцож байжээ.

Мөн энэ жил Улсын драмын эрдмийн театрын 85 жилийн ой тохиож байгаа билээ. Ойн баярын хүрээнд Их зохиолч Д.Нацагдоржийн амьдралаас сэдэвлэсэн шинэ уран бүтээл хийж байгаа гэнэ. Шинэ уран бүтээлийн найруулагчаар нь Соёлын тэргүүний ажилтан Ч.Түвшин ажиллаж байгаа юм байна.