Нийслэлийн хэмжээн дэх гэмт хэргийн гаралтыг бууруулах, иргэдэд гэмт хэрэгтэй тэмцэх, урьдчилан сэргийлэхийн талаар мэдлэг олгохын тулд “Хэв журмын урамшилт эргүүл”-ийг гаргахаар болсон. Энэ талаар ЦЕГ-ын Урьдчилан сэргийлэх, олон нийттэй харилцах хэлтсийн дарга, цагдаагийн дэд хурандаа Ү.Хосбаяраас зарим зүйлийг тодрууллаа.

 

-“Хэв журмын урамшилт эргүүл”-ийн талаар мэдээлэл өгөхгүй юу.  Хэзээ эргүүлд гарч эхлэх вэ?

 

-Нийслэлийн хүн амын тоо жил бүр өсч, хэт их нягтрал, ажилгүйдэл, ядуурал иргэд өөрийн болон бусдын өмч хөрөнгөд хяналт тавьдаггүй аминчхан, хувиа хичээсэн үзэл бодол нь давамгайлсан, хуулиар хүлээлгэсэн үүргээ биелүүлдэггүй зэргээс үүдэн гэмт хэрэг зөрчлийн тоо өсч байна. улаанбаатар хотын хэмжээнд 2016 оны долдугаар сард бүртгэгдсэн гэмт хэргийн статистик мэдээ, судалгаанаас харахад гэр, орон сууцанд зонхилон үйлдэгдэж буй өмчлөх эрхийн эсрэг, бусдын бие махбодид гэмтэл учруулах гэмт хэргийг бууруулахад засаг захиргаа, иргэний нийгмийн байгууллагууд, иргэд, оршин суугчдын хамтын хүч оролцоог нэмэгдүүлэх зайлшгүй шаардлага бий болж байгааг харуулж байна.

 

Тиймээс Улаанбаатар хотын цагдаагийн газраас Гэмт хэргээс урьдчилан сэргийлэх тухай хууийн хүрээнд “Хэв журмын урамшилт эргүүл”-ийн журмыг боловсруулан Нийслэлийн гэмт хэргээс урьдчилан сэргийлэх ажлыг зохицуулах зөвлөлд танилцуулж, НИТХ-аар батлуулахаар ажиллаж байна. Маргааш сургууль цэцэрлэгийн хичээлийн шинэ жилийн нээлт болно. Үүнтэй зэрэгцээд хүмүүсийн хөдөлгөөн ч ихэснэ. Тиймээс маргааш хэв журмын урамшилт эргүүл ажиллаж эхэлнэ.  

 

-Урамшилт эргүүлд хэчнээн хүн ажиллах вэ. Эдгээр хүмүүсийг хэрхэн сонгосон бэ?

 

-Нийгмийн идэвх сайтай, амьдарч буй хорооныхоо үйл ажиллагаанд идэвхтэй оролцдог 2500 иргэнийг хэв журмын урамшилт эргүүлээр бүртгэсэн. Хэв журмын урамшилт эргүүлийг ажиллуулснаар тухайн хорооны нутаг дэвсгэрт нийтийн хэв журмыг сахиулах, гэмт хэргээс урьдчилан сэргийлэх  чиглэлээр ажиллаж байгаа хүн хүч нэмэгдэж, цагдаагийн алба хаагчдын ажлын ачаалал тодорхой хэмжээгээр буурна. Дүүргүүдийн цагдаагийн хэлтсүүдтэй хамтарч эргүүлд гарах хүмүүсийг бүртгэсэн.

 

-Хэдэн төгрөгийн цалин өгөх вэ?

 

-Хэв журмын урамшилт эргүүлд гарч байгаа иргэдэд сарын 25 мянган төгрөгийн цалин олгохоор болсон. Гэмт хэргээс урьдчилан сэргийлэх ажлыг зохицуулах зөвлөлийн хурал өнгөрсөн мягмар гарагт болсон. Өөрөөр  хэлбэл, сонгуулийн дараа гэмт хэргээс урьдчилан сэргийлэх ажлыг зохицуулах зөвлөлийн анхны хурал боллоо. Хурлын үеэр эхний ээлжинд буюу 2016 онд санхүүгийн боломж, бололцоондоо тулгуурлан 2500 иргэн хэв журмын урамшилт эргүүлээр ажиллах боломжтой гэж тооцоолон төсөв гаргасан. Энэ асуудал шийдэгдсэн. Тэгэхээр 2500 иргэнийг сард 25 мянган төгрөгийн цалинтайгаар ажиллуулна. Ингээд бодохоор сард 62 сая 500 мянган төгрөг болж байгаа юм. Зөвхөн нэг сард шүү дээ. Дөрвөн сард дунджаар 250 сая төгрөг болно. 

 

-Ажиллах цагийн хуваарийн талаар мэдээлэл өгөхгүй юу. Ажлын найман цагаар ажиллах уу?

 

-Үгүй. Бидний төлөвлөж байгаагаар гэмт хэрэг ихээр бүртгэгддэг оргил цаг гэж болох 14:00-18:00 цагийн хооронд ажиллах юм.  

 

-Дахиж хүн бүртгэж авах уу.  Эргүүлээр ажиллах сонирхолтой хүмүүс байгаа байх?

 

-Яах вэ, харьяа дүүргийнхээ цагдаагийн хэлтсүүдийн Хэв журмын тасагт хандаж бүртгүүлж болно. Бид дүүргүүд дэх цагдаагийн хэлтсүүдээс бүртгэлийг нь авсан. Одоогийн байдлаар нэгтгээд байна.

 

-Эргүүлд гарах хүмүүсийг сургалтад хамруулах уу?

 

-Харьяа цагдаагийн хэлтсүүд дээр сургалтад хамруулна. Мөн хөдөлмөр хамгаалалттай холбогдуулан эргүүлүүдэд нэгдсэн журмаар ногоон хантааз тараана.

 

-Урамшилт эргүүл ямар үүрэг гүйцэтгэх вэ?

 

-Энэ төслөөс бид хэд хэдэн үр дүнг харж байгаа. “Хэв журмын урамшилт эргүүл”-д ажилласнаар нийслэлийн иргэдийн идэвх, санаачилгад суурилсан хяналт бий болж, аюулгүй орчныг бүрдүүлэх, гэмт хэрэг, нийгмийн хэв журмыг сахиулахад иргэдийн оролцоо нэмэгдэнэ. Мөн тухайн хорооны нутаг дэвсгэрт нийтийн хэв журам сахиулах, гэмт хэргээс урьдчилан сэргийлэх чиглэлээр ажиллаж байгаа цагдаагийн алба хаагчдын ажлын ачаалал багасах юм. Түүнчлэн иргэдэд ч гэсэн тодорхой хэмжээний ажлын байр бий болно.

 

-Есдүгээр сарын 1-тэй холбогдуулан бусад эргүүлийн тоог нэмсэн үү?

 

-Хичээлийн шинэ жилийн нээлт болохтой холбогдуулан нийслэлд гарч байгаа цагдаагийн эргүүлийн тоог нэмэгдүүллээ. Тухайлбал, авто эргүүл буюу хөдөлгөөнт эргүүл 65 чиглэлд 130 албан хаагч, явган эргүүл 300 чиглэлд 600 албан хаагч, морьт эргүүлд хоёр чиглэлд дөрвөн албан хаагч, нохойт эргүүлд дөрвөн чиглэлд найман албан хаагч, завьт эргүүлд хоёр чиглэлд дөрвөн албан хаагч гарсан. Нийт 646 албан хаагчийг хичээлийн шинэ жилийн нээлттэй холбогдуулан эргүүлийн үйл ажиллагаанд томилон ажиллуулж байна.