Францын долоо хоног тутмын “Шарли Хэбдо” шог сэтгүүл олон улсын шүүхэд дуудагдаж магадгүй болжээ. Энэ удаа нэхэмжлэгч  нь Итали байх бололтой.  Лалын шашны тэргүүн зөнч Мухаммедыг удаа дараа шоглон нийтлэснийхээ төлөө террорист бүлэглэлийн халдлагад өртсөн “Шарли Хэбдо” сэтгүүл тус террорист ажиллагааны дараа дэлхий дахинаа алдаршсан байдаг. 

Тэгвэл өнгөрсөн сард Италийн төв хэсэгт 6.8 магнитудын хүчтэй газар хөдөлж, 300 орчим хүн амиа алдсаны дараа  гамшигт өртөгсдийн зургийг Шарли Хэбдо сэтгүүл шоглон нийтэлж, италичуудыг дургүйцлийг төрүүлжээ. Улмаар газар хөдлөлтөөр хамгийн их хохирол амссан Аматриче хотын дарга тус сэтгүүлийг шүүхэд өгнө гэдгээ мэдэгдлээ. Мөн тэдний зүгээс сэтгүүлийн зургийг байж боломгүй доромжлол гэж үзэж буйгаа хэвлэлийнхэнд онцолжээ.

Хэргийг сануулбал, Италид газар хөдлөлт болсны дараа хохирогчдыг гурван төрлийн гоймонгоор дүрслэн шоглосон  зургийг Шарли Хэбдо сэтгүүл нийтэлж, байшингийн нурангид дарагдсан хүмүүсийг лазаннетай зүйрлэн зурсан байсан байв.