2021 онд эхлүүлсэн онцлог ажлын нэг бол Үдийн цайг Үдийн хоол хөтөлбөр болгож 1-5 дугаар ангийн 378.000 хүүхдэд үйлчилсэн. Гол хүндрэл нь нийслэлийн сургуулиудын 70 орчим хувь нь түрээсийн гал тогоотой. Нэг хүүхдэд оногдох хоолны зардлыг нэмж 1500 төгрөг болгосон ч энэ зардлын 800 орчим нь түрээсийн гал тогоо ажиллуулдаг хүмүүсийн халаасанд ороод байна. Уг нь 1500 төгрөг нь нийтээрээ хүүхдийн аяганд орох ёстой. Энэ хөтөлбөрийг хэрэгжүүлэх гол бодлого бол бүх сургууль өөрийн гэсэн гал тогоотой байх. УИХ-аас баталсан Хоол үйлдвэрлэлийн тухай хуулиар ЕБС түрээсийн гал тогоотой байхыг хориглосон байгаа. Ганцхан жилийн дотор түрээсийн гал тогоог гаргаж чадахгүй. Харин сургуулиудыг өөрийн гал тогоотой болгох, гал тогооны тоног төхөөрөмжийн шинэчлэлийн санхүүжилтийг жил бүрийн улсын төсөвт бодлогоор тусгуулж, үе шаттайгаар зохион байгуулан ажиллаж байгаа.