Энэ долоо хоногийн аймгийн Засаг даргын шуурхай хуралдаан болж, хуралдааныг Засаг дарга С.Батжаргал удирдан явууллаа. Хуралдааны эхэнд аймгийн Тамгын газрын ХШҮДАХ-ийн дарга Жанболат өнгөрсөн долоо хоногийн шуурхай хуралдаанаар өгсөн үүрэг даалгаврын биелэлтийг танилцууллаа. Өнгөрсөн долоо хоногийн шуурхай хуралдаанаар “Эрдэнэт Ус дулаан түгээх сүлжээ” ОНӨХТ-ийг байшин хорооллын усны үнэ тарифын талаар тодорхой мэдээлэл ирүүлэхийг үүрэг болгосон. Тус байгууллагаас ирүүлсэн мэдээлэлд өмнө нь нэг литр ус нэг төгрөг 10 мөнгө байсныг нэг төгрөг 60 мөнгө болгож 50 мөнгөөр нэмжээ. Ингэснээр нэг тонн буюу нэг метр куб усны үнэ 1600 төгрөг болсон гэх мэдээллийг Тамгын газрын ХШҮДАХ-ийн дарга М.Жанболат танилцууллаа.

Үүнтэй холбоотойгоор Засаг дарга С.Батжаргал “Эрдэнэт Ус дулаан түгээх сүлжээ” ОНӨХК-ийн удирдлагуудад ажилтнууддаа сургалт, мэдээлэл хийх, ард иргэдэд мэдээллийг цаг алдалгүй түргэн шуурхай өгч байхыг сануулав. Түүнчлэн Баян-Өндөр сумын А1001, А1002 болон хот доторх эвдэрч гэмтсэн авто замд нөхөөс хийх, засварлах үүрэг даалгавар өгсөн. Үүний дагуу ажлын хэсэг гарч нөхөөс хийх, засварлах, замын тэмдэг тэмдэглэгээ хийх ажлууд хийгдэж байна. Мөн хүүхдийн автобусыг нэмэгдүүлэх чиглэлээр тооцоо судалгааг гаргахыг хариуцсан байгууллагуудад үүрэг болгосон. Холбогдох байгууллагаас шинээр хүүхдийн автобус явуулах чиглэл, маршрутын жагсаалтыг гаргасан. Өнөөдрийн байдлаар 15-р сургуулийн 1380 сурагч хүүхдийн автобусаар зорчиж байна гэх мэдээллийг өгсөн.

Өнгөрсөн долоо хоногийн шуурхай дээр шинээр баригдаж байгаа орон сууцны хороолол дотор хүнд даацын автомашин ихээр явж байгаа нь замын эвдрэлд нөлөөлж байгаа тухай асуудал хөндөгдсөн. Үүний хүрээнд Хөрөнгө оруулалтын хэлтэс, Авто тээврийн төв, МХГ,Замын цагдаагийн газар, “Орхон АЗЗА” зэрэг холбогдох байгууллагууд уулзаж, хот дотор ачааны автомашиныг цагийн хязгаарлалттай хөдөлгөөнд оролцуулах түр зөвшөөрөл олгохтой холбоотой аймгийн Засаг даргын 2018 оны А/170, 2020 оны А/680 дугаар захирамжийн биелэлтийг хангах, хяналт тавьж ажиллах чиглэлийг өгчээ. Засаг дарга С.Батжаргал “Иргэдтэй уулзаад явахад мэдээлэл дутуу байна.

Төрийн мэдээлэл иргэдэд нээлттэй ил тод болсон гэж байгаа болов ч хөрсөн дээрээ хэр бууж байна вэ гэдэгт анхаарах хэрэгтэй. Иргэдийн гаргасан санал, хүсэлт дээр үндэслэсэн хөрөнгө оруулалтын ажил хийгдэх ёстой. Ингэж байж үр өгөөжтэй, бодит ажил болно. Өмнөх жилүүдийн хөрөнгө оруулалтын саналыг хараад байхад дарга нар өөрсдийн саналаа тусгасан байдаг. Засаглал тогтвортой, ил тод байх нь бид бүгдийн хамтын ажиллагааны үр дүн” гэв. Монгол Улсын Ерөнхийлөгчийн санаачилсан “Нэг тэр бум мод тарих” хөдөлгөөн орон даяар өрнөж буй. Үүний хүрээнд Орхон аймаг “Ногоон Эрдэнэт” хөтөлбөрийг хэрэгжүүлэн 2024 он гэхэд 20 сая мод тарих зорилт тавин ажиллаж буй.

Энэ талаар Засаг дарга С.Батжаргал “Гэр бүлээрээ мод тарих орчинг бий болгох ёстой. Ингэснээр гэр бүлээрээ тарьсан модоо арчилж, торддог, эргэж тойрдог амралт чөлөөт цагаа өнгөрүүлэх таатай орчин бий болно” гэлээ. Тэрээр шуурхай төгсгөлд хөрөнгө оруулалтын ажлыг ард иргэдэд ил тод, хүртээмжтэй сурталчлах, ЕБ-ын 14 дүгээр сургуулийн баруун талд байрлах өргөтгөлийн суурийн дүгнэлт гаргахыг МХГ-т тус тус үүрэг болголоо.