Засаг даргын зөвлөлийн X удаагийн хуралдаан боллоо. Хуралдаанаар аймгийн хөдөө аж ахуйн салбарын 2022-2023 оны өвөлжилтийн бэлтгэл хангах ажлын төлөвлөгөө, Өрхийн тариалалтыг дэмжих хөтөлбөрийг хэрэгжүүлэх 2022 оны ажлын төлөвлөгөө, Эрдэнэт хотын 2022-2023 өвөлжилтийн бэлтгэл хангах ажлын төлөвлөгөө болон бусад асуудлыг хэлэлцэж ИТХ-ын хуралдаанаар хэлэлцүүлэхээр баталлаа. “Өрхийн тариалалтыг дэмжих дэд хөтөлбөр”-ийг 2017-2020 онд хэрэгжүүлснээр 2020 онд аймгийн хэмжээнд төмс 366 га-аас 4508 тонн, хүнсний ногоо 382 га-аас 5802 тонн ургац хураан авсан нь өмнөх жилүүдтэй харьцуулахад өссөн дүнтэй байна.

Өөрөөр хэлбэл, уг хөтөлбөрийг хэрэгжүүлснээр төмс тариалах талбай гурван хувь, ургац 16 хувь, хангамж 35 хувь, хүнсний ногоо тариалах талбай 12.6 хувиар тус тус өссөн байна. Уг хөтөлбөрийг аймгийн Иргэдийн төлөөлөгчдийн хурлын 2021 оны долоодугаар сарын 1-ний өдрийн тогтоолоор баталсан. Өнөөдрийн байдлаар 888 айл өрх, 12 аж ахуйн нэгж газар тариалангийн үйлдвэрлэл эрхэлж байна. Энэ онд аймгийн хэмжээнд 4968 га талбайд ургац хураалтын ажил хийхээс 4908 талбайд хураалтын ажил гүйцэтгэн ургац хураалт 98.8 хувьтай хийж гүйцэтгэжээ. 2020 онд аймгийн хүн амын хэрэгцээт улаан буудайг 100, төмс 100, хүнсний ногоо жимс, жимсгэнийн 0.1 хувийг орон нутгийн үйлдвэрлэлээр хангажээ. 2021-2024 онд хэрэгжүүлэх уг хөтөлбөрт дөрвөн зорилтыг дэвшүүлж 11 үйл ажиллагааг хэрэгжүүлэхээр тусгажээ.

Үүнд, төмс, хүнсний ногооны төрөлжсөн аж ахуйн нэгж, хоршоог хөгжүүлэхэд эдийн засгийн таатай орчинг бүрдүүлэх зорилтын хүрээнд төмс хүнсний ногоо, жимс жимсгэнийн үйлдвэрлэл шинээр эрхлэх, үйлдвэрлэлээ өргөжүүлэхэд урт хугацаатай санхүүгийн эх үүсвэр олгох боломжийг бүрдүүлэх зэргийг тусгажээ. Хөтөлбөр хэрэгжсэнээр аймгийн хүн амын хэрэгцээт төмсийг 100 хувь, хүнсний ногоог 70 хувь, жимс жимсгэнийн 0.3 хувийг орон нутгийн үйлдвэрлэлээр хангах, нийт хүнсний ногооны ургацад хамгаалагдсан хөрсний үйлдвэрлэлийг 5 хувьд хүргэнэ гэх мэт хэд хэдэн үр дүнд хүрнэ гэж зорьж байна.

Аймгийн ИТХ-ын Тэргүүлэгчдийн 2021 оны арван хоёрдугаар тогтоолоор аймгийн Хөдөө аж ахуйн салбарын 2021-2022 оны өвөлжилтийн бэлтгэл хангах ажлын төлөвлөгөөг батлуулсан. Төлөвлөгөөнд мал аж ахуйн чиглэлээр 16, газар тариалангийн чиглэлээр 14, мал эмнэлгийн чиглэлээр 5, хүнсний ногооны 1 нийт 36 арга хэмжээг тусган 97.7 хувийн гүйцэтгэлтэй ажиллажээ. 2022-2023 оны хөдөө аж ахуйн салбарын өвөлжилтийн бэлтгэл ажлын төлөвлөгөөнд нийт 42 нэр төрлийн ажил төлөвлөснөөс 11 нэр төрлийн ажлыг гадаадын зах зээл, улсын болон орон нутгийн төсвийн 56.9 тэрбум төгрөгийн хөрөнгө оруулалтаар 31 нэр төрлийн ажлыг тухайн байгууллагын дотоод зохион байгуулалтаар 33.8 тэрбум төгрөгийн ажил хийхээр төлөвлөжээ. Тухайлбал, бэлчээрийн худаг уст цэгийн бэлэн байдлыг хангах, шинээр гаргах буюу засварлах ажлыг хугацаанд нь хийж гүйцэтгэх, намрын ургацаас чанар сайтай үрийн болон хүнсний буудайн нөөц бүрдүүлэх ажлыг шуурхай зохион байгуулах зэрэг ажлыг тусгажээ.